Program Setipikit Betanam Betupi bisi disedia ba IPS, Semonggok

KUCHING: Program Setipikit Betanam Betupi ke disedia Institut Pertanian Sarawak (IPS), Semonggok meri awak belajar ngagai raban nembiak ari menua pesisir.

Pemangku Direktor Opis Betanam Betupi Sarawak (JPS) Dr Alvin Chai madah awak belajar nya ungkup sida ti udah nembuka peresa SPM tang enda diterima masuk ba universiti.

“Tajapia, nengah program ke disedia Institut Perta- nian Sarawak, Semonggok ditu, raban nembiak tu ulih nampung pelajar renggat diploma di Universiti Putra Malaysia Kampus Bintulu (UPMKB),’ku iya.

Iya mansutka jaku nya ba pengerami Konvokesyen ke- 13 Institut Pertanian Sarawak, Semonggok ditu, kemari.

Alvin nambah ungkup Sesi 2016/2018, 20 iku graduet ari institut nya udah mujur diterima masuk di UPMKB.

Ku iya, sida nampung pelajar renggat diploma ba mayuh bengkah bidang, baka ke betanam betupi, pengerai jelu enggau nupi jelu, penau kampung enggau dagang betanam.

Ngenang kaul ke sama, Alvin madah 84 peratus ari penyampau 1,466 graduet ke pansut ari Institut Pertanian Semonggok kenyau taun 1985 udah bulih kereja.

“Sida tu kereja di mayuh bengkah ejensi baikka nya ba perintah tauka kompeni.

“Penyampau 5 peratus agi ngaul diri ba pengawa dagang lalu ngereja pengawa betanam betupi dikena ngulihka pemisi belanja,’ ku Alvin,

Kemari, 94 iku graduet iya nya 56 iku lelaki enggau 28 iku orang indu nerima Setipikit Betanam Betupi sida.

Setipikit disua Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah.