Bisi 16 tim ngambi bagi ba Pekit Futsal diatur SRDC
SIBU: Sepenyampau 16 tim ari Selangau, Skuau, Tamin, Lemai enggau Sibu udah ngambi bagi ba Pekit Futsal ke diatur Gerempung Raban Nembiak Selangau enggau Opis Kaunsil Menua Pesisir Sibu (SRDC), empai lama tu tadi.
Pekit ke diatur beserimbai enggau Pesta Selangau 2018 dipenyadi kaunsilor Dali Merawing, siku ari raban SRDC ba Zon Selangau.
Bela datai maya tu iya nya Chairman Gerempung Raban Nembiak Selangau Wat Melana Umpang.
Maya bejaku ba pengawa bejadi pekit, Dali minta raban nembiak chakah ngereja pengawa ke manah nyengkaum baka lumba enggau main dikena nyeliahka diri ari ngereja pengawa enda menuku.
Ku iya, nembiak ke regas baka tu beguna ba pengawa ngemansangka menua dudi hari ila.
“Nya alai, pekit baka tu tau bendar nempa ulah besemekih enggau pangan diri kelimpah kitai bela besaup nyintalka kaul enggau orang bukai,” pia ku iya madah.
Berebak enggau tu mega, SRDC ku iya semampai nyendiaka diri deka nyaup raban nembiak ari pengawa beberika belanja dikena ngatur pekit nangkan ke tu ila.
“Piak SRDC mega bisi ngungkupka belanja dikena ngemanahka agi padang main nyengkaum gelanggang futsal.
“Ari pekara tu dia SRDC semampai besemak enggau raban nembiak ditu,” ku iya madah baru.
Awak tu dikena Dali meri terima kasih ngagai Gerempung Raban Nembiak Selangau laban ulih bekerejasama enggau SRDC ngatur pekit sehari nya kelimpah beripai ngemanahka gelanggang futsal alai bepekit nya.