Udah maya iya Dayak bisi perau kediri patut dikayuh bebala mayuh ngelawa pemujur
SIBU: Parti Bansa Dayak Sarawak (PBDS) deka nyadika ‘perau’ bansa Dayak iya ke ngelama tu semina nyadika ‘sengayuh’ perau orang bukai.
Chairman Parti Bansa Dayak Sarawak PBDS Sitak Tengah, Julius Enchana madah, udah maya iya bansa Dayak bisi perau diri empu ke patut dikayuh bebala mayuh ngelawa pemujur ba politik.
“Kitai enda ulih belama iya nyadi ‘sengayuh’ dikena ngayuhka perau orang.
“Nya alai, PBDS ditumbuh ngambika kitai bela bisi perau dikayuh baka enggi orang,” pia ku iya madah maya Program Randau ba Rumah Peter Sayong di Durin, ujung minggu tu tadi.
Julius madah, diatu bansa Dayak nyengkaum peranak Kunsil Nengeri (DUN) Dudong patut belabuh mutarka
Nya alai, PBDS ditumbuh ngambika kitai bela bisi perau dikayuh baka enggi orang. Julius Enchana Chairman PBDS Sitak Tengah
kuing politik sida ngagai politik ke engkeman agi ti ulih mai pemaik ngagai diri.
Ku iya, enti ba PBDS, reti iya Dayak mega udah bisi ‘perau’ diri empu ti deka nyadika menalan alai mantaika hak enggau jaku tampak agi ti ngelama tu mayuh disebut tang enda didinga sereta bangat dikemana.
“Ketegal nya, penyerakup bansa kitai besai reti enti kitai deka meda diri empu tampak dipeda orang ba dunya politik.
“Ari nya, penemu kitai ba politik meseti diubah seraya bela bepegai ba pangan diri ngemujurka politik bansa Dayak,” ku iya madah baru.
Ba pekara bukai, PBDS siti ari komponen parti ba Sarawak Baru ( SB) deka ngirai manuk sabung sida ba DUN Dudong maya Pengawa Bepilih Nengeri (PRN) ti deka datai kelimpah ba penuduk DUN bukai.
Kelimpah PBDS, SB mega dikeringka Sarawak Workers Party (SWP), Parti Tenaga Rakyat (Teras) enggau State Reform Party Sarawak (STAR).
SB bela diperitaka belabuh ngatur singkang napi PRN serak tu alai sida udah saum penemu bebagika penuduk diri empu ba semua 82 iti DUN.
Bekaul enggau juluk ati PBDS ti deka ngirai manuk sabung ba DUN Dudong, Tuai Rumah Peter Sayong ti bela ngulu program sehari nya madahka diri ngasaika parti nya patut disukung rayat dia.
“Penuduk DUN Dudong udah lama amat dipegai orang bukai alai diatu udah maya iya gintir bansa kitai Iban nyadi pengari rayat ditu.
“PRN ke- 12 tu patut dikena kitai semenua lebih agi kitai serumah bela berunding nama ubah politik maya hari.
“Tang taja pia, runding enggau sukung rayat bela patut disungkak agi enggau pengeransing bala ketuai pati parti ti ngembuan tanggungpengawa nyadung polisi enggau penemu parti diri ba rayat mayuh,” pia ku iya madah maya nya.
Sama bela datai ba program ke diatur begulai enggau SB tu iya nya Sapit Presiden SWP, Capt (B) Engga Unchat, Ketuai Pati PBDS Kapit Mejar (B) Moses Ripai, Mengga Mikui (Selangau), Anjie Seli (Pasai Siong), John Siang ( Pasai Bon) enggau pengari ari TERAS, Pasang Ngelambai.