Anang ngerembaika berita ti bedau temu pengamat
MIRI: Raban nembiak ditu dilalau ngambika bisi tanggungpengawa agi maya bekenaka internet lalu anang guai ngerembaika berita enda temu pengamat, penerang, gambar tauka pekara bekaul bukai ba media rama.
Menteri Muda Kaunsil Kandang Menua, Datu Dr Penguang Manggil madah sida patut ngenukuka penerang enggau ari ni penatai penerang nya nyata sereta tulin sebedau sida mantaika penerang nya ba internet laban nyangka sida tau naburka berita tauka penerang pelesu.
“Revolusyen industri 4.0 ti jampat amat ngerembai kemaya hari udah ngemendarka mayuh amat akses ngagai bemacham kereban gajet enggau laman media rama.
“Nya alai, nyadi langkar enggau reta dudi hari ngagai nengeri enggau menua kitai, raban nembiak meseti nemu baka ni bekenaka media rama ngena pemintar runding baka ngena iya ti ulih meri penguntung ngagai kita, tang enti sema salah guna, kitai tau ngerusak menua enggau kita empu mega,” ku iya.
Dr Penguang mega ngansak raban nembiak nyerenih dulu penerang diterima sida ari laman media rama enggau bejejimat.
“Kita patut nyerenih tetiap penerang sekalika iya betul tauka enda. Enti enda, anang ngerembaika iya lalu kena runding kita nyerenih iya.
“Pengering media rama chukup besai. Iya tau ngerusak bala ketuai enggau menua,” ku iya nambah.
Dr Penguang mansutka jaku tu lebuh bejaku bejadi pengawa nutup 2018 Baram Cup Closed Dayak and In- vitations Badminton Team Championship ba Piasau Boat Club kemari.
Pekit keterubah diatur Se- Tech Badminton Club enggau Raban Nembiak Baram sereta kerejasama ari Opis Menteri Nembiak enggau Lumba sereta Serakup Badminton Miri meda penyereta 18 enggau 13 tim ba kategori lelaki enggau indu. Lebih 180 pemain datai ari Kuching, Bintulu, Belaga, Lawas, Limbang enggau Miri bisi ngambi bagi.
“Pekit baka tu nyadi pelasar manah ngagai kitai ukai semina ngali penau baru enggau nerenakka gaya idup bepengerai ngagai raban nembiak selampur Sarawak, tang mega pekara beguna agi iya nya dikena ngerapitka agi kaul bebakih enggau pangan diri, kelebih agi raban nembiak ari luar bagi menua Miri,” ku iya.
Dr Penguang mega besemaya deka bebendar nyaup bala pengatur pekit dudi hari.
“Aku ngarap deka meda pekit baka tu seruran diatur nyadi pekit ninting taun lalu dikearap ulih dipasuk dalam kalinda atur pengawa Miri,” ku iya.
Pekit dua hari berunggu meda Tim SeTech- Baram Youth A enggau Tim Ara dipadu bulih gelar champion kesemua kategori lelaki enggau indu, lalu pulai ngemai perais mata duit, trofi enggau midul.
Atur pengawa lemai nya richah agi enggau pemerindang live band enggau chabut benasit.
Sama bisi datai ADUN Mulu Datuk Gerawat Gala enggau ADUN Telang Usan Dennis Ngau, Chairman SeTech Stephen Avun enggau Chairman Pengatur Kaunsilor Dominic Nyurang Ajang.