Bejimat ngaduka sambung karan, anang sampai ngenusah penguna
SIBU: Peranak rumah panjai ba Jalai Salim-Stabau ditu minta raban kunteriktor ari ejensi ti nyendiaka bekal kuasa karan bejimat agi ngintu maya bejalaika pengawa nyambung kuasa karan, tali karan enggau ke bukai ba endur ti besemak enggau rumah sida.
Kebuah pia, peranak ditu napi penanggul bekal kuasa karan tejanggal urung lima jam, lebih ari timpuh ditetap kelimpah bekal kuasa karan tejanggal tiga kali, ensana (Hari Minggu).
Nitih ku siku peranak enggai dikelala nama, gerah ti dikeluar ba surat berita menua tu madah bisi penanggul bekal kuasa karan tenggal ba menua sida berengkah ari pukul 9 pagi nyentuk pukul 5 lemai.
“Taja pia, kuasa karan pulai baru baka selama pengudah pukul 5 lemai baka dipadah dalam gerah, tang semina beberapa mimit udah nya, kuasa karan tejanggal baru.
“Pengudah nya, urung dua jam, kuasa karan pulai baru tang udah nya tekelap baru. Penanggul sama nyadi baru dataika iya pulai baka selama urung pukul 9.35 malam,” ku iya madah ngagai Utusan Borneo kemari.
Ku iya, pengudah telefon ngagai ejensi bekaul, baru bekal kuasa karan pulai baka selama.
“Enti gerah udah madah penanggul kuasa karan te- janggal deka nyadi ba sekeda timpuh, patut kereja tembu nitihka timpuh lalu anang ngelui ari nya.
“Nitih ku penerang, kereja digaga ba simpang rumah panjai kami. Pukul 5 lemai sida udah pulai, tang bekal kuasa karan tejanggal dua ngagai tiga kali udah nya,” ku iya nandu.
Ketegal penanggul nya, iya irau deka mangka peranak kelebih agi diatu peresa UPSR udah majak semak, lalu tentu ngachau bala anak ti benung belajar ba rumah.
“Kitai ngarapka raban kunteriktor ari ejensi bekaul ngambika megai tanggungpengawa lebih agi sereta profesional, nentuka kereja sida enda ngachau peranak.
“Bala sida patut nentuka kereja digaga memanah, anang mangka peranak enggau penanggul. Raban sida patut sedia ba endur gawa ngadang nyangka bisi pekara bukai nyadi,” ku iya.
Kelimpah ari nanggul bala anak belajar ba rumah, kereban leterik mega tau rusak enti sema bisi penanggul bekal kuasa karan tejanggal nyadi dua tiga kali.
“Enti kereban elekterik rusak, kitai deka minta ganti rugi sida, nya kebuah kereja meseti digaga manah lalu patut dikemata bala staf ari ejensi nya,” ku iya nambah.
Iya minta ejensi bekal kuasa karan ditu ngemataka kereja ti dipejalai raban kunteriktor sida lalu patut tembu nitihka gerah ti dikeluar.
“Dataika diatu, kami enda nemu nama kebuah penanggul kemari nyadi, pengudah telefon nuju sida mutarka penanggul nya lalu diatu kitai dekaka sida enda nampung kereja bukai udah tu, pengudah kereja tembu digaga raban kunteriktor sida,” ku iya.