Pengerami Hari Merdeka 2018 diatur Tadika Perpaduan Desa Senadin richah
MIRI: Tadika Perpaduan Desa Senadin ngintu pengerami Hari Merdeka 2018 begulai enggau apai indai, bala pengajar enggau nembiak mit, richah rami enggau bemacham chura sereta penyelai budaya ari pengarap ti bebida.
Bisi datai bejadika pengerami nya Pemesai Penyerakup Miri, Ikhwan Mohd Hanapi.
Pengerami dipungkal enggau lagu nasional, Sarawak Pertiwi ku enggau jaku ngelalu ari komiti pengatur datai ari Rukun Tetangg Desa Senadin Phase I, II enggau III nyengkaum bala pengajar ari pra-sekula.
Sama bisi datai Chairman Rukun Tetangga Desa Senadin Phase I, Willie Lijia Deseh enggau Chairlady Rukun Tetangga Desa Senadin Phase III, Theresa Lire Usang, bala pengajar, Salbiah Manshor, Jacqualine Jimmy, Nor Hasimah Rangkut enggau Nur Afina Zamri.
Nitih ku Ikhwan, kerejasama ari semua raban ba pekara belanja, gawa enggau langgur penemu nyadi pekara besai ba penyulut atur pengerami, meda mayuh apai indai bekenaka pekayan ngayanka bansa Malaysia ngambi bagi dalam pengerami nya.
Ku iya, tu semengat talukka menua peranak Malaysia sereta mandangka kuasa merintah diri ti udah dijapai kitai ari pengawa ditegika aki ini, baka ke bisi diatu, serakup bansa Malaysia ari pupu bansa enggau pengarap.
Ku iya, sejarah meseti ditemu rebak nembiak kenyau ari pra-sekula ngambika pemar ditapi ngulihka kuasa megai perintah diri enggau penusah bala ketuai ke dulu ditemu sida, pekara diasaika sida diatu.
“Pekara beguna amat iya nya semengat talukka Malaysia diterenak ngagai rebak nembiak ngambika sida nemu baka ni pemar ditapi bala ketuai dulu menya negika kuasa megai perintah diri,” ku iya.
Antara aktiviti diatur ba tadika nya baka pekit ngelinsu ungkup nembiak mit, telematches ungkup apai indai, tanda poco-poco kelimpah ari dinahka pemakai enggau ai irup.
Sida ti bisi datai mega beperindang enggau apai indai ti bepenau nyereta main ti bisi diatur ba pengerami nya.