Projek ngaga Jematan Kpg Selampit begunaka belanja tambah RM20 juta
LUNDU: Projek ngaga Jematan Kampung Selampit ke ditangguh lebih 10 taun begunaka agih belanja tambah urung RM20 juta ngambi iya ulih dikemujur.
Kaban Kunsil Nengeri (ADUN) Opar, Dato Ranum Mina madah projek nya udah dikemendar perintah besai ke dulu suba enggau agih belanja RM10 juta.
Taja pia, bepelasarka pansik dipejalai ejensi bekaul, agih RM10 juta nya enda chukup dikena ngaga jematan nya.
“Aku udah madah pekara tu ngagai Sapit Kepala Menteri, Tan Sri James Masing ke mega Menteri Pemansang Infrastruktur enggau Perengka Pengangkut. “Iya (Masing) madah deka minta agih belanja tambah ungkup projek nya lalu nyema wang belanja nengeri bisi baru projek nya ulih dikemujur,” ku iya.
Iya madah munyi nya rambau pengerami makai taun ke-53 Gerija St. Gregory, Kampung Selampit ditu kena Hari Enam tu tadi.
Ngelansa isu jalai ke nyambung genturung pendiau nya enggau Kampung Pasir Hilir enggau Kampung Kendaie ari Jalai Biawak, Ranum madah pekara nya udah suah dikenatai ngagai Perintah Nengeri enggau mega Perintah Besai.
Ku iya, nyema Perintah Nengeri ulih ngena belanja diri empu ngetar jalai tu nyadi engka nya ulih dikereja enggau lengkas.
Jalai Kendaie panjai 10 kilometer endang siti aja jalai alun ba sitak N.1 Opar ke bedau ditar.
Jalai tu suah ditengah peranak Kampung Kendaie, Kampung Pasir Hilir, Kampung Bukit Batu enggau sida bukai ari Kampung Selampit alai ngangkut buah sawit ngagai kilang.
Ngelansa pasal peminta piak gerija nya deka ngulihka belanja dikena ngemanah balai gerija nya, Ranum meri sukung deka ngungkupka belanja penyampau RM80,000 ba taun baru.
Belanja ke bisi ba taun tu ku iya enda chukup ungkup nya, nya alai aku besemaya enggau piak gerija deka nyendiaka agih belanja ba penyampau ke udah disebut taun nyin ila.