PKR deka ngubah chara bekimpin di Sarawak ngambika teulihka pemujur ba Pengawa Bepilih Nengeri deka datai
SIBU: Parti Keadilan Rakyat (PKR) deka nunda chara di Semenanjung Malaysia ngingkaska penuduk Gabungan Parti Sarawak (GPS) di nengeri tu nyengkaum ba menua pesisir maya Pengawa Bepilih Nengeri (PRN) ti deka datai.
Mandal Presiden PKR Rafizi Ramli madah, chara tu lebih agi ngemeranka pengawa ngatur kimpin ke saintifik ti bepelasarka penerang ke chukup iya ke digumpul sebedau PRN belabuh.
“Kitai deka ngubah chara bekimpin di Sarawak laban kelimpah penerang ke chukup kimpin mega deka bepelasarka runding politik pengundi.
“Chara tu udah dipeda mujur alai kitai ukai semina mujur ngalahka kubu kuat UMNO baka di Johor, Melaka enggau Negeri Sembilan maya Pengawa Bepilih Besai (PRU) empai lama tang bela ngambi nengeri nya,” pia ku iya madah maya aum media di Sibu, ensana.
Penatai iya ke Sibu laban ngulu Program #Reformasi 20 Tahun ditu.
Rafizi madah, enti chara nya dikena enggau manah, PRK nadai penanggul ngalahka kubu kuat GPS nyengkaum di menua pesisir.
Ku iya, ke beguna diatu PKR di Sarawak meseti belabuh begumpulka penerang kelimpah silik nemu nama isu ke bisi nyadi ba rayat.
“Dua taun sebedau PRN diatur siti timpuh ke chukup dikena kitai nyendiaka diri ngena chara tu.
“Taja kimpin nya mujur di Semenanjung tang nyangka enda engkeman dikena di Sarawak tang chara iya endang sama iya nya chukup awak begigaka penerang enggau isu rayat,” ku iya ti mega chalun Sapit Presiden PKR.
Rafizi mega madah, perintah besai ke diatu pegai Pakatan Harapan (PH) deka nempa senario politik ke baru ba PRN serak tu.
“Ari nya, penatai aku ke nengeri tu endang deka beduaka penemu enggau bala bakih PKR ditu.
“PKR enggau PH naka alah ngaga pemadu manah ngambika nengeri tu bela dipegai PH ba tuju ngelantangka agi perintah besai nyaup ngintu polisi enggau hak rayat Sarawak,” pia ku iya sambil beterima kasih ngagai perintah Sarawak laban ti udah ngemendarka iya tama kitu sepengudah ditagang kenyau ari taun 2014 suba.
Sentang pengawa PH bebagika penuduk maya PRN, Kaban Parlimen Julau, Larry Sng ti nyempulang Rafizi maya tu nimbal, pekara nya empai dirandau naka ke diatu.
“Kitai agi bisi awak ti chukup berandauka pekara tu sebedau PRN diatur.
“Pia mega pekara tu deka dirandau enti semua pengari dalam PH betemu magang,” ku iya nyaut tanya.
Chara tu udah dipeda mujur alai kitai ukai semina mujur ngalahka kubu kuat UMNO baka di Johor, Melaka enggau Negeri Sembilan maya Pengawa Bepilih Besai (PRU) empai lama tang bela ngambi nengeri nya. Rafizi Ramli Mandal Presiden PKR