Ketuai komuniti enggau nembiak redak meseti besaup ngaduka pemansang
BARAM: Menteri Muda Kaunsil Kandang Menua, Datu Dr Penguang Manggil udah bejadika jalai sepanjai 6.1km nyambung Rh George Ijus Jawa ngagai jalai besai Pengelayan ditu apin lama ke udah.
Pengawa ngaga jalai batu ti berengkah dalam taun 2016 lalu udah tembu dalam taun nyin tadi ti ngaul ungkus RM4.7 juta.
“Projek jalai tu iya nya projek dipejalaika perintah nengeri pulaika pemaik rayat, kelebih agi peranak menua nya,” ku Kaban Kunsil Nengeri (ADUN) Marudi madah lebuh bejaku bejadika Program Pemesai Begulai Enggau Rayat ba Rh George Ijus Jawa apin lama ke udah.
Sama bisi datai bini Dr Penguang, Datin Monica Ukong, Sekretari Politik Kepala Menteri Alexander Asing Sadai, Chairman Kaunsil Pelilih Marudi Kuansilor Edward Mendai, Penulung Pemesai Pelilih Marudi Norlela Ulis, tuai rumah 78 pintu rumah panjai, Tuai Rumah George Ijus Jawa enggau peranak bukai, sekeda bala ketuai komuniti ari Ili Baram enggau peranak pupu bansa datai ari kandang ngelingi.
Dr Penguang nyemetak madah program diatur dikena nyendiaka pelasar ngagai bala pengundi enggau ketuai komuniti mantaika langgur penemu enggau pekara ke patut diperati sida, kelebih agi senentang tanah Adat Bansa Asal (NCR) enggau gaya poli- tik di nengeri kemaya hari.
Ba jaku iya, Dr Penguang mantaika batang randau, antara iya, hak Sarawak ti udah lenyau ngelama tu nyengkaum kuasa ba pemansut minyak enggau gis, ngurangka kandang tasik nengeri, sereta Sarawak nyadi bakih ba pengawa numbuhka Malaysia.
Iya mega ngayanka pengandal diri ngagai peranak menua pesisir ngambika begempung enggau bekerejasama enggau Gabungan Parti Sarawak (GPS) – ngiring Sarawak ba pengawa nyaga hak Sarawak di baruh Sempekat Malaysia 1963 (MA63).
Bala ketuai komuniti enggau nembiak redak ba kandang menua sida meseti seruran besaup enggau pangan diri nyapai juluk nempa Sarawak nyadi nengeri ti mansang, ku iya.
“Peranak menua pesisir meseti meruan begempung enggau bekerejasama gawa negika hak peranak Sarawak laban nadai orang bukai ulih ngereja pengawa manah agi ari peranak Sarawak empu. Aram kitai begempung ngemansangka nengeri kitai empu enggau nyaga hak kitai belalauka MA63.
“GPS iya nya pelasar chukup manah ngagai peranak Sarawak terus beserakup, enggau nadai nundukka ‘menyadi tuai’ Semenanjung Malaysia nyaga hak Sarawak dalam konteks MA63, Inter-Governmental Committee Report (IGCR) enggau Konstitusyen Malaysia,” ku iya nambah.
Dr Penguang mega madahka komiti khas deka beratika pekara bekaul enggau tanah NCR di Marudi deka ditumbuh enda lama agi.
“Aku dekaka peranak ditu maduka siku pengari nyadi kaban komiti tu. Iya meseti siku orang ti kering jaku sereta bepenemu ba pekara tanah NCR enggau isu tanah ngelingi kitai ditu,” ku Dr Penguang.
“Ari ke mutarka pekara tanah NCR kediri aja, komiti tanah NCR deka ngempung peranak menua pesisir ditu nyadi siti raban aja, ke alai komiti deka gawa mutarka iyaenggau nganjung peminta ngagai menteri ti mangku pengawa ngambi atur patut dipejalai. Tu deka nentuka peminta kitai enda deka tinggal di belakang,” ku iya.
Berebak enggau program nya, Dr Penguang mega bejadika kedai Biro Indu rumah panjai nya sereta ngemendarka agih belanja penyampau RM5, 000 ngagai biro indu rumah panjai nya seraya RM5, 000 da ngagai Komiti Pemansang enggau Pengelikun Genturung Pendiau (JKKK) sida dikena ngemanah enggau aktiviti rumah panjai dudi hari.