Pengajar tadika ngempu gelar Miss Tagang International 2018
KUCHING: Siku pengajar tadika, Chris Hazel Christus, 22, mujur ngalahka 11 iku pemekit bukai ngujungka iya ngempu gelar Miss Tagang International 2018 kena malam Hari Enam tu tadi.
Iya pulai mai perais mata duit RM1,300, trofi enggau setipikit.
Penuduk lumur dua dipenggi Jelianicca Lorettanisha Rumih seraya Natasha Suna lumur tiga.
Seduai bela pulai ngemai perais mata duit RM800 enggau RM500, disempulang trofi enggau setipikit.
Jelianicca mega nerima penyampau undi pemadu tinggi dikena menggi gelar Miss Tagang Popular lalu nerima perais mata duit RM500 enggau trofi.
Pekit udah diatur ba Kampung Semadang, Jalai Puncak Borneo beserimbai enggau 4th Semadang International Tagang Festival diatur ujung minggu tu tadi.
Menteri Muda Perengka Pengangkut Datuk Dr Jerip Susil udah bejadika pengerami lalu nyuaka perais ngagai bala pemenang.
Dr Jerip ba jaku dipansutka iya muji peranak Kampung Semadang enggau Opis Betanam Betupi Nengeri ti udah begulai ngatur pengawa laban sida udah mujur ngatur pengerami ti udah datai ba renggat ke empat.
Iya beratika pengerami majak besai tetiap kali iya diatur sereta meri pemerat ba ekonomi ti meri pemaik besai ngagai peranak Kampung Semadang enggau sida ke diau kandang ngelingi.
Iya ngarapka pengerami deka seruran diatu lalu iya bisi ngemendarka geran pen- yampau RM50,000 ungkup pengerami taun baru.
Pengerami dua hari berunggu matak urung 10,000 iku pengusung ari menua tu enggau menua luar ti mega nyereta mayuh macham aktiviti nyengkaum pekit ngintu, pekit tanda asal enggau muzik asal, pekit berapi enggau bemacham aktiviti bukai.
Sama bisi datai malam nya bini Dr Jerip, Datin Lee Chai Foong, nyuaka perais ngagai bala pemenang.