Sida ti rinduka pengawa lumba, main meseti bebendar besemekih ngambika enda semina digelar ‘jaguh kampung’
MIRI: Menteri Muda Nembiak enggau Lumba Datuk Snowdan Lawan minta semua bansa Dayak ti rinduka pengawa lumba ngambika bebendar agi ngelaban jaku tempa ‘ jaguh kampung’ sereta mansang ngagai tikas ti kompetitif agi.
Pengeransing ari jaku peransang ‘ Agi Idup Agi Ngelaban’ tau dikena meransang bansa Dayak nyadi champion dalam pekit lumba di Malaysia enggau ke bukai, ku iya.
“Anang takut. Menang tauka alah iya nya sebagi ari main.
“Pekara ti beguna amat iya nya pengeransing dalam pekara lumba enggau disiplin sereta peneleba, ke alai kita udah bepekit enggau pemain pemadu manah,”ku Snowdan lebuh iya bejaku bejadika ‘Baram Cup Close & Invitation Tournament’ ba King Sports Centre ditu, apin lama ke udah.
Berebak enggau nya, Snowdan, ti udah ngambi bagi ba mayuh bengkah pekit GoKart ba renggat antarabansa
Pekara ti beguna amat iya nya pengeransing dalam pekara lumba enggau disiplin sereta peneleba, ke alai kita udah bepekit enggau pemain pemadu manah. Datuk Snowdan Lawan Menteri Muda Nembiak enggau Lumba
nyengkaum ba Thailand, Hong Kong, Filipina enggau Indonesia lebuh maya iya agi biak, ngenangka semina siku iya aja Iban ari Sarawak ba palan lumba nya.
Iya mega bekunsika peneleba diri empu bakani iya ngaum asai ati raban lebuh diatur bepekit ngelaban pemain menua luar ti nyulut agi. Ku iya, iya seruran ngingatka diri empu ke alai iya ‘Anak Iban’ lalu semengat ‘Agi Idup Agi Ngelaban’ udah meri peransang ngagai iya.
Nya kebuah, iya ngarap deka meda mayuh agi ‘Anak Dayak’ ngembuan semengat nya ba ulah sida dalam bidang lumba.
Snowdan mega meri peransang ngambika pekit nya diangkat nyadi pekit tebukai dudi hari.
“Bai semua pemain ti manah ari sebarang alai begelumu ba endur kita bepekit enggau kita. Udah sedia bala kita?” ku iya nanya lalu jam- pat disaut enggau jaku au ari bala mayuh.
Ku Snowdan, iya bisi kebuah meransang sida ngambi pekara nya. Laban iya udah beratika pemain bansa Dayak enda entu gagit lebuh sida nemu diri deka bepekit enggau bansa bukai, ke alai ba mayuh pekara, sida milih enda nyereta pekit nya.
Iya ingatka semina siti aja — Piala Menteri Muda Badminton Open in Kuching, ti nyendiaka perais mata duit ngagai penerang, tang mimit amat tim datai ari pemain bansa Dayak nyereta pekit nya.
“Aku nemu, mayuh tim bansa Dayak di luar din. Sida tu pemain ti manah tang nyangka sida berundingka diri enda manah bepekit enggau bansa China, bala Melayu enggau India. Tu ulah ti ngasuh ati aku bingung.
“Lebuh bepekit ngelaban sama bansa Dayak, sida tu nyulut amat. Tang ngelaban bansa bukai tauka pemain menua luar, sida milih enggai ngelaban sebedau main berengkah. Tu ngalahka diri. Tu salah,” ku penemu iya.
Ku iya, iya deka seruran ngatur Piala Menteri Muda Badminton Open lalu udah tu deka diatur di Sibu, dientudika Bintulu enggau Miri. Enda dikenggai pekit tu deka matak mayuh pemain manah ari komuniti China, kelebih agi di Sibu, tang iya melabaa tim Dayak mega deka kering.
Pekit keterubah tu disereta lebih 180 iku pesereta diatur begulai Raban Nembiak Baram enggau Se-Tech Badminton Club.
Sama bisi datai Chairman Raban Nembiak Baram Kaunsilor Dominic Nyurang Ajeng enggau Chairman SeTech, Stephen Avon.