Larry agi gagit gawaka komuniti di Kapit
KAPIT: Kaban Parlimen (MP) Julau, Larry Sng Wei Shien udah besemaya deka nampung pengawa mulaika diri ngagai Kapit, gawaka bala komuniti ditu.
“Pengudah Pengawa Bepilih Besai Ke-14 (PRU14) 9 Mei 2018, Pakatan Harapan (PH) mujur megai Perintah Besai di Putrajaya. Ba Kapit, kitai nadai pengari rayat PH tang kitai agi randakka Kapit mansang.
“Kitai ngarapka pemansang deka datai kitu, nya kebuah aku enggau MP Sibu, Oscar Ling Chai Yew, deka kitu mantu peranak Kapit. Kitai enggaika Kapit deka tinggal di belakang ba pemansang.
“Diatu kitai bisi jalai, Jalai Kapit- Song- Kanowit, benung digaga ba mayuh renggat. Taja pan bedau tembu, tang kitai deka nganti,” ku Larry Sng.
Ku iya, nengah pemisi jalai nya, kitai deka berati lalu ngarapka raban bumai enggau pengempu tanah ngemansangka tanah sida, ngeluarka asil betanam betupi baka sawit, getah, lada enggau ke bukai.
“Aku diatu mangku pengawa nyadi Chairman Kaunsil Lada Malaysia. E-pekebun (tani) dikena ngerejista pekebun lada. Berapa mayuh tubuh pekebun lada enggau penyampau asil dipansutka sida dirikod ngambika mudah meri bantu nengah pelin strategi, pemansang enggau chara ke pemadu manah mantu sida.
“Nengah e- networking, dikena ngemesaika dandang kebun ti meri fokus ba agrotani, ti beratka pengawa nanam lada. Kitai ngarapka pemeranak puku ari menua luar deka ngaul diri ba pengawa agro-tani kelebih agi lada dikena nambahka asil.
“Aku ngarapka pekebun menua tu beranakka puku nanam lada laban aku meda bisi pemujur dudi hari,” ku Larry Sng kena lemai Hari Satu, lebuh iya bejadika Program Info Komuniti Beserimbai enggau Festival Tanglung Festival Sereta Hari Malaysia 2018 ba Town Square, ke digulu lebih ari 1,000 iku peranak ari semua serak komuniti.
Iya beambika chunto, sebedau tu, Malaysia nyadi menua pengeluar lada Lumur Satu Dunya. Vietnam di belakang Malaysia, tang diatu, Vietnam nyadi pengeluar lada Lumur Satu Dunya. Iya beratika gaya pengawa di Malaysia, lebuh rega komoditi baka lada niki, bala pekebun nanam lada. Tang lebuh rega nurun, sida nejuka lada tauka utai tanam komersial bukai pia aja.
Ngenang pasal Festival Tanglung ku Larry, aktiviti ke baka Tanglung tu iya nya budaya lalu ukai politik. Tu patut nadai ngaul pekara politik.
“Aku berasai lantang meda pemayuh tubuh ti bisi datai, nyau baka ngelaluka pemulai aku pengudah tujuh taun, lebuh bepilih George Lagong mujur nyilih iya nyadi Kaban Kunsil Nengeri ( ADUN) Pelagus enggau 2016 ke alai Wilson Nyabong Ijang, ADUN ke diatu.
“Malam tu, kitai ditu ngerami Tanglung Festival enggau Hari Malaysia 2018. Chukup temegah ati meda pengerami Tanglung Festival diintu ninting taun. Pengerami tu ngempuruka semua bansa, enda ngira penatai rama enggau pengarap.
“Taja pan Tanglung Festival tu pengerami asal bansa China, tang aku berati di Sarawak, semua kitai deka datai begulai berami. Baka pengerami nerima pengabang maya Taun Baru China, Gawai Dayak enggau Hari Raya Aidilfitri, kitai ngusung pangan diri berami begulai. Aku ngarapka pengawa ti manah, penyerakup enggau pengelantang komuniti ti dikemeran tu deka ditan sereta meruan nyentuk ke jemah, nyadika chara idup kitai,” ku Larry.
Ku Larry baru, iya beratika bisi sekeda raban enda enggau ngulu pengerami malam nya. Festival Tanglung iya nya aktiviti ti nadai ngaul politik. Aku ngasaika genap iku kitai patut begelumu sereta berami. Tu mih maya begulai enggau bekunsika pengerami,” ku iya.
Berebak enggau pengerami nya, iya udah ngemendarka belanja sepenyampau RM3,500 ungkup aktiviti nya.
Berebak enggau nyaPemesai Pemadah Bagi Menua Kapit, Judy henry Anchangan madahka ‘Komuniti 1Malaysia’ udah dikalih nama ngagai ‘Muafakat Komuniti’.
Ku iya, bisi 11 Maufakat Komuniti Malaysia di Kapit baka Taman Indah, Sungai Yong, Nanga Melekun, Nanga Antaroh, Kampong Melayu, Pasar Kapit, Genturung Sekaban, Bukit Goram, Kampong Sawang, Sungai Bena enggau Sungai Tisa.
Antara batang tuju Maufakat Komuniti Malaysia ku iya, dikena nerenakka semengat talukka menua bepelasarka lima prinsip Rukun Negara, meri peransang semua serak komuniti ngambika ngaul diri sereta nerenakka semengat diri sekaban, sereta nyadi jematan antara raban renggat baruh enggau perintah dikena ngerembaika agenda pemansang enggau polisi perintah.
Chairman Muafakat Komuniti Malaysia Pasar Kapit, Ma Tian Ho, nikalka kenang, Tanglung Festival udah diintu kenyau ari 18 taun ke udah, taun 2000 suba. Sebedau tu pengerami diatur Serakup China Bersatu Kapit (UCA) nyadika pelasar ngempung semua peranak Kapit nadai ngira usul pengarap rama enggau ngintu pengerami Kuih Bulan.
“Aku tekenyit malam tu meda penatai beribu dedat mensia. Antara kitai ditu, 400 iku nembiak sekula enggau bala pengajar ari SJK © Hock Lam, bisi 100 iku ari SK Kampung Baru enggau 50 iku ari SK Methodist.
“Kitai bisi nerima penatai ari bala kaban Biro Indu Kampung Melayu, UCA, Serakup Tai San Ten, Serakup Foochow, Serakup Chiang Chuan, Serakup Kwang Tung, Kelab Lion, Kelab Lumba enggau Rekreasyen Opis Residen enggau Pelilih ( RANDO), Kelab Lumba enggau Rekreasyen Opis Kereja Raya (SOKANJAYA) enggau ke bukai.
“Kitai begempuru ba tengah pasar ngerami Tanglung Festival sereta Hari Malaysia kena 16 September. Pekara ti beguna amat, kitai begempuru enggau pangan diri ditu, nadai ngira ari ni penatai laban kitai deka nerenakka asai diau bebaik enggau diri sekaban ti diau besemak sereta semengat taluk enggau angkunka menua kitai.
“Bala nembiak bisi ditu laban kitai dekaka sida ari umur biak diseridi enggau pemanah ulah taluk enggau angkunka bansa,” ku iya.
Antara aktiviti ngintu pengerami baka tanda singa, ngelepaska tanglung, nyadung tambai Jalur Gemilang, bejalai bebala mayuh mai tanglung penyauh 1.2km enggau nyepi kuih bulan.
MP Sibu Oscar ling Chai Yew, Judy Henry Anchangan, bala staf Opis Pemadah Wennie Mathew, Budin Gumbang enggau Evelyn Edward, Pemesai Pengatur Pengawa Opis Residen Kapit Rolyn Terrance Janting, Pemesai Pengatur Pengawa Opis Pelilih Kapit Bidah Lujah, Chairman Muafakat Komuniti Malaysia Pelilih Kapit Tang Bukok, Penyanding Penemu Maufakat Komuniti Malaysia Pasar Kapit Dato Yong Hua Sing, Chairperson UCA Sng Geok Yien, sereta bala bukai antara bala bisi datai berami.