LPB enda mansa Brunei manahka ekonomi kandang menua utara

KUCHING: Pemutus enda ngaga projek Jalai Besai Pan Borneo ( LPB) ti nyambungka Sarawak enggau Sabah mansa Brunei deka ngerichahka agi penumbuh ekonomi ba Kandang utara Sarawak.

Sapit Kepala Menteri, Tan Sri Datuk Amar James Jemut Masing madahka jalai projek Jalai Besai Pan Borneo nya patut berengkah ari Pasar Marudi ke Long Terawan lalu udah nya mansa (tisi) Taman Negara Mulu sepemanjai antara menua Sarawak enggau Brunei terus ke Ulu Sungai Limbang enggau Ulu Sungai Trusan.

Udah nya ku iya, jalai nya deka disambungka enggau Pasar Lawas sebedau besatup enggau garis antara menua Sabah.

“Aku setuju enggau Menteri Besai Tun Dr Mahathir Mohamad ke alai Jalai Besai Pan Borneo enda patut digaga mansa Brunei.

“Jalai ke dipansa patut berengkah ari Pasar Marudi ke Long Terawan udah nya mansa (tisi) Taman Negara Mulu sepemanjai antara menua Sarawak enggau Sabah terus ke Ulu Sungai Limbang enggau Ulu Sungai Trusan, udah nya disambung enggau Pasar Lawas sebedau besatup enggau antara menua Sabah,” ku iya kemari.

Masing ti mega Menteri Pemansang Infrastruktur enggau Perengka Pengangkut madahka jalai nya deka muka jalai nyentuk ke Ulu Sungai Limbang enggau Sungai Trusan di Lawas.

“Jalai besai tu amat deka meri penguntung ngagai rayat ke diau di menua ulu kandang utara Sarawak.

“Penyauh iya nya urung 250 kilometer enggau ungkus belanja dipelabaka urung RM3.5 bilion,” ku iya nerang.

Dr mahathir Hari Satu apin lama lebu sesi tanya saut pengudah meri licha di Universiti Brunei Darussalam madah, Malaysia enggau Brunei nengah polisi udah setuju, projek Jalai Besai Pan Borneo enda digaga mansa Brunei.

Pemutus nya disetuju maya iya betemu enggau Sultan Hassanal Bolkiah ba Istana Nurul Imam di Brunei nyerumba penemuai rasmi iya ke menua nya.

Nitihku Dr Mahathir, pemutus setuju nya bepelasarka sekeda kebuah tauka faktor bekaul enggau kelebih agi ungkus, kelimpah ari nya isu imigresyen nyema jalai besai digaga merentasi Brunei.