Nengah agenda pemansang perintah nengeri ti meri agih belanja ke ADUN GPS ungkup pengelantang rayat
MARUDI: Perintah Sarawak nyamin deka seruran ngemeratka peranak menua pesisir baka ba sitak Telang Usan nengah fokus agenda pemansang perintah nengeri.
Pekara tu udah berat diperatika perintah nengeri kenyau ari niang Pehin Sri Datuk Patinggi Adenan Satem tauka lebih agi dikelala enggau kangau Tok Nan ti udah nyilih penuduk nyadi ketuai nengeri kitai. Ari strategi, tu dikena nentuka agenda pemansang naka ulih jampat agi dipejalai.
Jamin tu diberi Kepala Menteri Datuk Patinggi Abang Johari Tun Openg ti nyilih tanggungpengawa nyadi ketuai nengeri, nampung juluk enggau tuju pengawa niang Tok Nan, ti fokus ba pemansang menua pesisir.
Tu ukai semina jaku tempa pia aja, tang disukung enggau pengawa nyata sereta ngamatka semaya enggau pekara nyata ba tuju strategi iya nya agih belanja RM5 juta setaun ngagai genap iku kaban kunsil nengeri (ADUN) ari Gabung Parti Sarawak (GPS) kenyau ari taun 2016.
“Ari agih belanja RM5 juta nya, nyadi pengari rayat ari parti megai perintah, aku ulih ngemendarka peminta penyikap perengulih ngemendarka peminta penyikap perengka guna bala pengundi lalu pengawa dipenyadi kitai ditu sehari tu, jalai semin rumah panjai kita, nyadi siti pekara nyata perintah ngamatka semaya ti udah digaga.
“Nyadi sebagi ari pengawa kitai ngangkatka tikas penyikap perengkaguna rumah panjai. Nadai kala nengeri kitai kelebih agi kandang menua pesisir udah ngasaika pemanah baka tu. Nya kebuah, enti peranak menua pesisir deka seruran nerima pemansang, sida meseti seruran bisi pengandal enggau nyukung GPS.
“Beri sukung nadai bebagi enggau tegut ngagai Abang Johari, kepala menteri enggau perintah GPS ti udah nyata ngayanka diri sikar gawa ngatur pekara nengeri,” ku iya
Jaku tu dipansutka ADUN Telang Usan, Dennis Ngau ba sebengkah pengerami diatur ba Long Tebangan ke- mari. Long Tebangan urung tuju jam pejalai nengah darat ari mengeri Miri.
Ku Dennis Ngau nambah, ari agih belanja RM5 juta ungkup Projek Transformasyen Menua Pesisir (RTP) tetiap taun ari perintah nengeri, peranak menua pesisir ba nengeri tu nyangka tau andalka peminta penyikap perengka guna pemun sida ditangkup sereta dipejalai.
Tentu mega langgur penemu agih belanja RM5 juta tu dipun rambau jeman niang Tok Nan ti nyadi Kepala Menteri, lalu diatu ditampung Abang Johari Tun Openg. Taja pia, kitai mega meseti ngenang pemanah pengawa bala ketuai dulu suba ti udah gawaka nengeri nyapai penatai pemisi baka diterima kitai diatu.
Ba lansa bukai, senentang pekara ngemendarka Kanun Tanah baru diberi kuasa undang-undang, ba Pemakai Menoa enggau Pulau Galau ( PM/ PG) diatu dikumbai Native Territorial Domain (NTD), Dennis Ngau ngansak rayat minta kenuku ari raban bekaul dikena nyeliah saru penemu – pemerat ari orang ngatika diri tauka raban ti nguji beambi ulih ba pekara nya.
Nya jalai mar ditengah bala Komiti diketuaika Sapit Kepala Menteri Datuk Amar Douglas Uggah Embas, ti dilempaika pengandal ari Kepala Menteri Abang Johari Tun Openg ngambika berati enggau ngiga pemutar isu timpuh panjai ngagai peranak asal Sarawak.
Iya nyamin sida, kesemua penemu ti patut ari semua raban enggau bala ketuai etnik ba nengeri tu udah dibai dalam perati sepanjai dua taun atur nyendiaka diri sebedau mantaika iya ba DUN tu tadi.
“Nya kebuah aku andal amat kesemua peminta raban etnik udah dibai dalam perati, nya alai kitai terus nyingkang lalu nguji nentuka tanah dipenggi kitai deka diberi pala tanah lalu pekara beguna agi seruran meri pemaik timpuh panjai ngagai kitai.
“Bekaul enggau Genturung Pendiau Long Tebangan, pengentap pendiau entigis di menua ulu, aku merambu kita nyukat tanah NCR enggau NTD lalu nguji ngiga chara pemadu manah bekenaka iya nyadi peransang pemansang ungkup timpuh panjai ngambika penyikap perengka guna baka jalai ulih digaga.
“Anang kiruh bekimpin ningkah pelin pemansang Perintah Nengeri laban semua pelin ungkup timpuh panjai lalu deka digaga pengudah pansik silik dipejalai.
Ketuai Kampung Long Tebangan, TK. Juk Emang ba jaku ngelalu iya meri terima kasih ngagai Dennis Ngau, ti udah mayuh gawaka Long Tebangan.
“Kitai ulih meda sereta ngasaika pengawa ti udah digaga iya ngagai genturung pendiau enggau nembiak redak.
“Iya chukup kiruh sereta ketuai ti bagas gawa, kemerah begulai enggau kitai, iya meretika peminta kitai taja kitai ke nyadi ketuai enggau komiti genturung pendiau nadai minta. Iya nemu nama peminta enggau peneka kitai.”
“Tu mih penyelai Dennis Ngau,” ku iya.
Iya ngansak nembiak redak terus nyukung Dennis nentuka iya ulih ngenataika peminta rayat ngagai bala ketuai tetinggi ba nengeri tu.
Sama bisi datai Kaunsilor MCC, Kaunsilor Dominic Nyurang Ajang enggau bala komiti rumah panjai nya.
Ari agih belanja RM5 juta nya, nyadi pengari rayat ari parti megai perintah, aku ulih ngemendarka peminta penyikap perengulih ngemendarka peminta penyikap perengka guna bala pengundi lalu pengawa dipenyadi kitai ditu sehari tu, jalai semin rumah panjai kita, nyadi siti pekara nyata perintah ngamatka semaya ti udah digaga. Dennis Ngau ADUN Telang Usan