Bisi SOP dikena munaska jelu ti dirampit rabies
KUCHING: Sapit Kepala Menteri Datuk Amar Douglas Uggah Embas mejah ulah sebuah surat berita menua tu laban ngeluarka berita enda dituku pengamat, madahka perintah Sarawak kasar jelu ba pengawa munaska rabies.
“Aku berasai asa amat macha ripot berita ti madahka sida ti digerah gawa nangkap ukui lelang, ngelemaska jelu nya, naka ditemu aku, bisi atur prosedur operasyen standard (SOP) dikena opis veterinar ba pengawa mindahka jelu siga nya.
“Nya ukai ngelemaska ukui nya laban ulah baka nya chukup nadai penyinu. Enti pekara baka tu nyadi, kitai deka bejalaika atur terit ngagai orang ti ngereja iya,” ku iya lebuh dikerandau ekslusif begulai enggau The Borneo Post ba opis iya kemari.
Berindik ari nya, Uggah ke nyadi Menteri Betanam Betupi Moden, Tanah Adat enggau Pemansang Kandang Menua udah ngatur pejalai gawa ngagai Makmal Diagnostik Veterinar Negeri (SVDL) di Kota Samarahan begulai enggau ketuai editor surat berita nya.
Batang tuju pejalai nya deka ngulihka penerang ti betul sereta lurus bejalaika pengawa ngagai bala staf ti dituduh gawa enggau nadai penyinu ngagai jelu nya.
“Maya nya, kami ngangauka pengarang berita nya, James Ritchie meda empu gaya pengawa ba SVDL di Kota Samarahan,” ku Uggah nerang.
Ku iya, sida diberi penerang ari pemesai SVDL bekaul enggau SOP pengawa mindah jelu siga ditagit pechaya amat berita nya endang pelesu.
“Nadai ukui lelang dilemas baka ti dipadah pengarang berita. Nadai pekara nyata sebarang ukui dilemas lalu nadai tangki ai baka ti didawa ba dalam ripot berita nya.
“Semina siti tangki ai aja bisi ba premis nya, iya nya tangki meresi ai ti meri bekal ai beresi ngagai makmal,” ku iya.
Uggah nyemetak madahka Opis Veterinar Sarawak nitihka protokol ti terit amat.
“Kitai deka nentuka mensia mayuh kelebih agi sida ti ngempu ukui, SOP deka seruran dititih. Opis Veterinar nadai kala bekenaka chara ti kasar dikena munuh ukui,” ku iya nandu.
Uggah madahka iya asa meda pengawa surat berita nya ngeluarka berita nadai dituku pengamat, tau dikumbai ngasut enggau ngasuh mensia mayuh ti sayauka jelu begau.
“Kami asa enggau pengawa surat berita tu laban ngeluarka ripot ti nadai tanggungpengawa baka nya, nadai pekara nyata ti dituku pengamat.
“Tu tau ngasuh mensia mayuh nyima enggau begau kelebih agi sida ti ngempu ukui,” ku iya.
Berebak enggau nya, Direktor Opis Veterinar (JPV) Sarawak, Dr. Adrian Susin Ambud ti sama bisi datai ba randau nya madahka iya deka ngaga ripot polis ba hari ke sama (kemari), irauka ripot berita nya deka ngeruga pengelikun bala staf sida.