Snowdan: GPS tegap, komited mai pemansang Rayat anang irau lalu beri mih sukung ke tegap ngagai GPS, parti nengeri tu empu baka selama
KUCHING: Perintah Sarawak ke diarika Gabungan Parti Sarawak (GPS) mengkang tegap lalu seruran deka mai pemansang ngagai nengeri tu, ku Menteri Muda Nembiak Lumba enggau Main, Datuk Snowdan Lawan.
Berindik enggau nya iya ke mega Kaban Kunsil Nengeri (ADUN) Balai Ringin ngelalau rayat di nengeri tu anang irau lalu minta sida meri sukung ke tegap ngagai GPS baka ke selama.
“Kitai di Sarawak mengkang perintah kitai empu. Perintah baru diatu iya nya GPS pengudah kitai ningkilka diri ari Barisan Nasional (BN).
“Gempung empat parti dalam GPS tu ngatika diri lalu bisi 72 iku kaban kunsil nengeri enggau 19 kaban parlimen.
“Reti nya kitai bisi 91 iku ‘Yang Berhormat’, kitai agi tegap, anang irau,” ku iya.
Snowdan mansutka jaku
Kitai di Sarawak mengkang perintah kitai empu. Perintah baru diatu iya nya GPS pengudah kitai ningkilka diri ari Barisan Nasional (BN). Datuk Snowdan Lawan Menteri Muda Nembiak Lumba enggau Main
nya rambau bejadi Tiang Pemun Projek Bekal Lekterik Menua Pesisir nyerumba program Ketuai Begulai enggau Rayat ke diatur di Rh Achang, Muding Danau, Pantu kena Hari Dua tu tadi.
Iya nambah, Perintah Sarawak diatu beratka pengawa ngemansang kandang menua pesisir lalu semua nya dipejalaika GPS.
“Kitai enda begunaka orang tauka parti ari Semenanjung, GPS parti nengeri tu empu lalu ke pemadu manah ungkup peranak nengeri tu.
“Tu mih kebuah kitai ningkilka diri ari BN ngambika kitai nadai kaul agi enggau Semenanjung Malaysia.
“Ngatika diri kitai nyamai, iya nya nyamai kitai nuntut hak ke disetuju ba Sempekat Malaysia 1963 kelebih agi ba sentang minyak,” ku iya.
GPS nyadi platfom ke pemadu manah endur kitai negi sereta ngenanka hak Sarawak ke alai MA63 deka nyadi terabai kitai, tandu Snowdan.
Ngenang sentang sekeda projek di nengeri tu ke diketu perintah baru Pakatan Harapan (PH), Snowdan madahka pekara nya mengkang ulih ditangkup Perintah Sarawak.
Enti perintah besai enggai meri agih belanja ku iya, kepala menteri udah madah deka nguna duit nengeri ba atur ngemujur projek pemansang ditu.
“Diatu kitai udah bisi bank kitai empu iya nya DBOS (Bank Pemansang Sarawak) lalu pia mega kitai udah numbuhka kompeni minyak kitai empu, Petros.
“Duit galau nengeri diatu ba penyampau RM32 bilion lalu tau dikena ngemansang kandang menua pesisir,” ku iya.
Ngenang sentang pengawa bejadi tiang pemun bekal leterik, iya madah nya ngelaika bekal lekterik deka datai di Muding Danau enda lama agi lalu mai pemaik ngagai Rh Achang sereta 16 rumah panjai bukai ke besemak.
“Kitai nirika ting lalu udah nya deka disambung enggau kabel lekterik. Nangkanka nya kitai nyendia bekal lekterik ba tetiap pintu rumah ditu,” ku iya.
Ba program sehari nya, Snowdan bisi ngagihka belanja tambah RM50,000 ungkup pengawa ngaga Balai Besai SK Muding ke alai dulu agi ari nya iya udah ngagihka penyampau ke sama.
Kelimpah ari nya, iya mega ngagihka RM5,000 ngagai Gerempung Apai Indai enggau Pengajar ( PIBG) SK Muding ke diterima Kepala Pengajar, Alfred anak Brandah.
Bela datai Kaban Parlimen (MP) Bukit Begunan Dato Masir Kujat, Pemancha (Simunjan) Peter Muni, Tr Achang enggau rayat bukai ari rumah panjai ngelingi.