Anang mendingka jaku penyakal sentang ubah ba kod tanah

KUCHING: Anang tepawah runding mendingka jaku achuk penyakal, laban ubah ba Kod Tanah Sarawak udah digazet maya Aum Dewan Kunsil Nengeri bulan Julai tu tadi, ku Menteri Nembiak enggau Lumba Datuk Snowdan Lawan.

Iya ke mega Kaban Kunsil Nengeri (ADUN) Balai Ringin madah, nengah ubah nya tanah adat bansa asal (NCR), pemakai menua enggau pulau galau tauka dikena diempu sereta deka diberi pala tanah.

“Mayuh orang ari penyakal iya nya ari PKR enggau DAP nguji deka nusutka runding rayat ba sentang pekara tu.

“Udah diputus rambau aum DUN pengelama lapan hari dalam bulan Julai tu tadi, tanah NCR kitai, iya nya pemakai menua enggau pulau galau tau dikena lalu diempu.

“Surat pala tanah udah nya deka diberi ngagai orang ke ngempu tanah,” ku iya ba pengerami Ketuai Begulai enggau Rayat di Rh Achang, Muding Danau, Pantu kena Hari Dua tu tadi.

Ku iya nambah, dulu agi ari tu perintah nengeri nengah Opis Tanah enggau Survei (JTS) bisi bejalaika pengawa nyukat kelingi lalu ditangkanka pengawa nyukat lot sesiku orang ke ngempu tanah.

Perintah Besai maya nya Barisan Nasional (BN) ku Snowdan bisi meri RM60 juta dikena ngemujur pengawa nyukat kelingi.

“Diatu aku enda nemu sekalika bisi agih belanja ari perintah baru Pakatan Harapan ungkup pengawa nyukat tu.

“Tang anang irau, kitai bisi Gabungan Parti Sarawak (GPS) ti deka ngemata pekara tu.

“Isu pemakai menua enggau pulau galau nadai agi ketegal ubah ba Kod Tanah Sarawak udah digaga lalu digazet nengah sain Tuai Megai Menua (TYT),” ku iya.

Ngenang kaul ke sama, iya madah randau sentang ubah nya begulai enggau rayat deka diatur ba tetiap sitak kunsil di tetiap rumah panjai.

Randau nya deka matak raban pemesai ari opis menteri, ejensi perintah baka JTS lalu deka nerangka ngagai semua bala tuai rumah, pengulu, pemancha, temenggung enggau rayat.

Ba Aum DUN bulan Julai tu tadi, lebih 40 iku raban ADUN bejuraika sentang ubah Kod Tanah Sarawak ke mungkur pekara ke bekaul enggau tanah NCR, pemakai menua enggau pukau galau.

Sapit Kepala Menteri ke mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah madah, ubah nya ke pemaik peranak Sarawak.