Kinsil projek LRT sereta fokus ngemanahka servis bas: PBDSB
KUCHING: Parti Bansa Dayak Sarawak Baru (PBDSB) dekaka projek Light Rail Transit (LRT) ti ditangguh dikinsil terus lalu ba sistem pengangkut mensia mayuh ngambika diangkat sereta dikemanah dikena nentuka pengasi iya.
Presiden PBDSB Cobbold John madah iya andalka singkang pengawa Kepala Menteri Datuk Patinggi Abang Johari Tun Openg ti nangguhka ngaga projek LRT tang deka manah agi enti iya lalu nginsil projek nya sereta manah agi fokus ba pengawa ngemanahka servis bas di Kuching enggau kandang menua ngelingi.
“Ba runding aku, kepala menteri patut neju ngagai ketuai rebak dudi berundingka pengawa ngaga LRT lalu perintah nengeri, ari baruh embing iya, patut berengkah serius berundingka pasal pengawa ngemanahka servis bas,” ku iya.
“Mayuh deka setuju enggau aku, ke alai nadai servis bas ba Kuching lalu nya kebuah kitai meda mayuh ruang bilik keran deka bisi kerita diri empu dikena nurun kereja enggau beranjungka anak sida ngagai sekula.”
Cobbold pechaya nadai se- bana berat ari mensia mayuh pasal penanggul angin kamah ketegal bas naka diatu.
“Iya enda patut ngansak kompeni bas bekenaka bus kuasa hidrogen tama ngagai jalai ba Kuching. Aku pechaya bas ngena kuasa diesel ti mega dikena suba enda balat ngamahka andi di Kuching. Nadai mega orang besebanaka bas ke ngena kuasa dieseI ti dikena ninting hari. Pekara ke beguna amat iya nya kompeni bas nyendiaka servis ti ngasi,” ku iya.
Lebuh meresi penerang ti datai ari orang dalam maya bulan September taun tu, Abang Johari madah iya deka nginsil perambu projek LRT ungkup Sarawak tang semina deka nangguh pengawa ngaga iya.
Nya mega madahka diri enda enda nemu nama kebuah portal berita nibak jaku ari penerang ti enda temu penatai, madahka iya deka nginsil projek nya.
Ku Abang Johari, pengawa nangguh meri jalai ngagai Sarawak fokus ba pemansang menua pesisir lalu ngaku projek LRT ukai agi nyadi pekara dikemeratka lalu agenda pemansang Sarawak deka dikemeratka.
Iya mansutka pekara tu pengudah nyadi chairman aum Kaunsil Besai PBB ba indu opis parti ditu.
Kena 10 Disember 2017, Abang Johari madahka Kuching deka nyadi mengeri keterubah di menua tu ngembuan bas kuasa hidrogen ba atas jalai pengudah tiga buah bas baka nya dipesan iya datai ari menua China dalam bulan Julai taun tu. Taja pia, bulan Julai udah lalu diatu.
Taun nyin tadi, Abang Johari madahka projek nya sebagi ari program pemansang enggau pansik hidrogen ari baruh Sarawak Energy Bhd (SEB) enggau Perintah Sarawak deka ngagihka RM10 juta ungkup program pansik ti deka dipejalaika SEB di baruh Unit Pansik Hidrogen sida.
Agih belanja pansik mega deka nyengkaum pengawa numbuhka palan lalu pakar menua luar dikena ngasilka gis hidrogen dikena meri kuasa ngagai bas, ku iya nengah penerang berita suba.
Iya nyemetak madah, utai kr diulih ari bas ti nadai ngelepas asap nyadi sebagi ari pelin timpuh panjai dikena nentuka sistem perengka pengangkut mensia mayuh Sarawak dipejalai ngena kuasa beresi setipak enggau gaya dunya kemaya hari ti nyaga rampa menua.
Kepala menteri sebedau tu kala mantaika perambu LRT ti nyambung Kuching enggau Serian, Samarahan enggau Damai mega deka dipejalai ngena hidrogen. Bus hidrogen deka diberi ngagai ejensi, nyengkaum siti ungkup dagang temuai, nyadika strategi dikena matak temuai enggau ‘Kuching mesra-alam’ enggau imej kuasa ke beresi.
Iya dekaka indu mengeri ngembuan pematak temuai ti tegap ngambika tau nyadi pintu penama dagang temuai baka Melaka.
Pia mega ku iya, Kuching enggau kandang menua Serian patut dikemansang nyadi palan dagang temuai tauka kandang menua dikena matak temuai sebedau sida mindah ngagai bagi menua bukai di Sarawak.
Iya nyemetak madah, seriris enggau pengawa ngalih ngagai ‘industri mesra-alam’, Sarawak mega patut nyerenih baru pemeranak puku menua luar ti suah agi mai industri ngeluarka rengka ti ngamahka angin.
Pengawa nguji ngulihka timbal ari mayuh bengkah opis bekuasa menua ditu ti dilanjarka ngagai aum pengarang berita ke bukai.