Kelebih agi rebak baru dikena nentuka pemujur pengawa pemansang, pengelikun menua
SIBU: Pengeransing nyungkakka agi pemansang menua dipun enggau reti patriotisme tauka talukka menua ti patut dikembuan genap iku rayat Malaysia.
Kaban Parlimen (MP) Sibu Oscar Ling Chai Yew madah, ulah nya endang semampai ditanggam kelebih agi ba rebak baru ke ukai semina ngemujurka pengawa ngaga pemansang tang bela nentuka pengelikun menua.
“Nembiak diatu ti nyadi orang ke nganti kitai megai menua dudi hari patut diembing, diajar sereta disikap enggau ulah angkun ke menua diri.
“Ari nya, Malaysia enggau rayat iya ti bejuluk ati besai deka semampai likun ba reti jaku merdeka kebendar,” pia ku iya madah maya dipebasa bejadi Kempen Kibar Jalur Gemilang Merdeka@Komuniti renggat sitak Sibu di SK Abang Ali ditu, kemari.
Program tu diatur Opis Pemadah Malaysia pampang Sibu enggau Mukah.
Berebak enggau tu mega, Ling minta rayat ngitang Jalur Gemilang enggau manah sereta anang nempia tauka ngitang iya ke udah charik.
“Jalur Gemilang tu nyadika lambang menua kitai.
“Nya alai, gitang nitihka pematut ngambika nama menua kitai dipeda manah lebih agi ba mua temuai ari luar,” ku iya madah.
Kelimpah mantaika pengangkun diri nengah pengawa ngitang menira, ku iya, rayat mega bela tau mantaika pengawa enggau program bekaul enggau merdeka nengah laman rama baka Facebook, Instagram tauka Twitter.
“Kitai patut berasai temegah ati laban sekali agi kitai ngintu hari merdeka enggau menua ti likun sereta nadai penyarut dalam politik.
“Rambai jaku ‘ Sayangi MalaysiaKu’ engkeman amat dipilih kena kitai mandangka menua tu diuwan pupu raban dalam pengelikun, sejalai sereta sayauka menua.
“Ketegal nya, minta semua kitai beserakup sereta besaup ngerami agi bulan merdeka tu,” pia ku iya madah baru.
Sama bela datai maya tu iya nya Pemesai Opis Pemadah Malaysia pampang Sibu enggau Mukah Ivy Stephen Sekai, Pemesai Pelilih Sibu Awang Yusup Awang Mostapha enggau Kepala Pengajar SK Abang Ali, Hamdi Najdi.