Industri fesyen, pekit pemajik pelasar dikena nyungkak dagang temuai di Sarawak
KUCHING: Industri fesyen enggau pekit pemajik bisi potensi besai ngerembai nyadi pelasar dikena nyungkak dagang temuai enggau komersil di Sarawak.
Menteri Muda Nembiak enggau Lumba Datuk Snowdan Lawan madahka raban nembiak di nengeri tu bisi bemacham penau ti narit ati sereta patut dibantai.
“Nengah nya, penau sereta pengelandik raban nembiak tu ulih nyaup perintah nengeri ngelakuka main asal enggau pengelain ke bisi di nengeri tu,” ku iya lebuh bejaku bejadika Malam Gala M.O Sarawak Ke-8 apin lama ke udah.
Pengerami makai lemai tu digulu urung 450 temuai, lalu sama bela digulu bini Snowdan, Datin Melinda Claudia Bucking, Sekretari Politik Kepala Menteri Petrus Igat Mathias enggau Sekretari Politik Kepala Menteri Susan Chendai Anding.
Pia mega Kaban Komiti Pendukung Askar Wataniah Negeri Sarawak Mejar (Kehormat) Alexander Kadir Dato, Sekretari Serakup Indu Dayak Sarawak Datin Senorita Linang, pengari Clara Elle, Mark Yohanes Kuan enggau bini, Daphne Mirra Thomas Babai sereta orang ti ngempu M. O Sarawak Augtine Das Basih enggau Asat Nawin@Mizta.
Berebak enggau pengerami nya, Snowdan nyuaka agih belanja RM10,000 ngagai M.O Sarawak dikena nyukung pengawa ngangkatka main asal raban bansa Dayak.
Kaban Kunsil Nengeri (ADUN) Machan Allan Siden Gramong mega bisi nyuaka agih belanja penyampau RM5,000 ngagai M.O Sarawak.
Berebak enggau pengerami nya, bisi diatur pekit kepenudi ‘The Face M.O Sarawak Kumang & Keling Edition’.
Vanessa Ritti ari Miri mujur menggi ketetiga kategori ti bisi dipekit lalu dipadu menggi gelar Kumang The Face M.O Sarawak 2018.
Gelar Lulong dipenggi Viviana Lin Winston ari Kuching seraya gelar Selinggar Matahari pulai ngagai Gloria Malong ari Sibu.
Ba ketegori lelaki, gelar Keling diempu Adriel Nyawai Robin ari Lubok Antu seraya Delly Ah Nen dipadu menggi gelar Laja lalu gelar Bungai Nuing diempu Mathew Bill.
Ba kategori Pemanah Ngepan, Herrie Singham udah menang ba kategori nya seraya Donavan Hugo Semun menang kategori Bujang Dikerindu sereta Charles Doll Stanley ba ketegori Mr Congeniality 2018 M.O Sarawak.
Atur pengerami malam nya richah enggau bemacham main asal enggau pemerindang ari bala artis menua Sarawak baka Winnie Albert, Gabriel Fairuz Louis, Syta Jin, Ronney Bukong, Billy Anderson Ngalai enggau penari nembiak mit, Radin.