Mungkur surat tanah ke ari baruh Skim Ngemesaika Genturung Pendiau (SPK), Skim Pengentap Pendiau Baru (SPS)
KUCHING: Perintahnengeri deka mulaika premium tanah sepenyampau RM43,447,264 ti mungkur 7,174 surat tanah dibaruh Skim Ngemesaika Genturung Pendiau (SPK) enggau Skim Pengentap Pendiau Baru (SPS).
Kepala Menteri, Datuk Patinggi Abang Johari Tun Openg madah, bepelasarka penerang ke dipadahka kena 7 Mei 2018, perintah nengeri ngaga pemutus nurunka penyampau premium tanah sepenyampau 50 peratus ungkup kededua skim nya di serata Sarawak.
Pemutus nurunka setengah peratus premium tanah nya dikena mantu rayat ngurangka ungkus idup ti majak niki.
“Berengkah 6 Mei 2018, premium tanah ungkup lot rumah endur diau dalam skim tu ditetapka enda lebih ari RM2,500 tetiap lot. Lalu sebarang bayar ti dibayar kena tauka pengudah dikemeranka 6 Mei nya ke ngelui RM2,500 deka dipulaika.
“Berindik ari pemutus nya bisi 7,174 surat tanah ti kena bayar pulai baru ti sepenyampau RM43,447,264.
“Nya alai pengempu tanah dipinta ngisi sereta nganjung peminta sida ( bekaul tu) ngagai Opis Tanah enggau Survei (JTS) enda laun ari 31 Oktober 2019,” ku iya seraya madah bisi timpuh setaun endur pengempu lot ngaduka pekara nya.
Abang Johari mansutka pekara nya dalam aum pengarang berita bekaul enggau pekara nya, ti diatur ba opis iya di Ringkat 5, DUN ditu, kemari.
Taja pia iya madahka premium tanah ke lebih bayar nya deka dipulaika ngagai pengempu asal lot tanah; lot ke dipindahka ngagai nampung ruang bilik/ pemegai ‘Letter of Administration’ enggau lot ke dipindahka ngagai kaban diri sebilik ti pemadu semak.
“Lebih bayar premium tanah ke dipulaika nya enda kena ungkup lot ti dipin- dahka nengah jual enggau beli (S&P),” ku iya.
Enggau pemutus ti nurunka 50 peratus nya, pengempu surat tanah semina mayar premium tanah RM2,500 dibandingka sebedau tu RM5,000.
“RM2,500 premium tanah ba dua skim nya ulih dibayar pupuk dalam timpuh 10 taun, reti nya RM250 setaun,” ku Abang Johari.
Dalam aum pengarang berita ke sama Sapit Kepala Menteri ti mega Menteri Pemansang Mengeri enggau Pengeraja Asal, Datuk Amar Awang Tengah Ali Hasan madahka, bisi 318 skim ti kena bungkur ke enda nyengkaum projek baru.
“Naka ke diatu, ba serata nengeri kitai bisi 121 SPS enggau197 SPK lalu penyampau semua nya bisi 318 skim, tang enda nyengkaum projek baru.
“Lalu penyampau semua lot ke disediaka ba serata nengeri bisi 46,968 lot lalu ari penyampau nya bisi 36,219 lot udah diungkup.
Sama bisi datai ba aum pengarang berita nya kemari, Sapit Kepala Menteri Datuk Amar Douglas Uggah Embas, Menteri Muda Perambu Mengeri, Pengatur Tanah enggau Rampa Menua Datu Len Talif Salleh sereta Direktor JTS Zaidi Mahdi.