Gerempung, kelab di Serembu patut regas ngatur aktiviti lumba
BAU: Gerempung enggau Kelab ba sitak Kunsil Nengeri (DUN) Serembu patut regas ngelawa raban nembiak awakka sida rindu nyereta aktiviti komuniti enggau lumba.
Kaban Kunsil Nengeri (ADUN) Serembu (ADUN) Serembu Miro Simuh madah, atur baka nya beguna amat dikena nentuka raban nembiak enda tepejuh enggau ulah enda menuku.
Kenu ku iya pengawa ngelawa raban nembiak mega patut seruran dipeja;ai dikena nempa pengerindu sida ngambi bagi ba sebarang aktiviti lumba enggau komuniti.
“Berebak enggau nya, se- mua gerempung enggau kelab patut ngatur mayuh aktiviti enggau program awak bala sida ke nembiak lebih agi ba sitak Serempu ulih nempa kaul enggau pangan diri.
“Kitai enda ulih ngenggai tanggungpengawa raban nembiak tu endang beguna amat laban sida deka nentuka kuing tuju menua dudi hari ila, lalu tentu genap gerempung enggau kelab nya ngembua atur ke pintar dikena ngemujurka juluk nya,” ku iya rambau pengerami makai taun ke- 2 Kelab Lumba Rekreasi Krokong (KSRK) ba Dewan Krokong ditu kilah ensana.
Berebak enggau nya, Miro madah atur ke lebih nyemetak patut dikena mutar mayuh bengkah isu ti ngaul bala nembiak engagu ngambi enda ngasai diri dikemelu.
Ku iya, atur ke patut endang meseti dipejalai dikena mantu kelimpah ngelala nama pekara ke deka dipinta sida nengah program- program ke bisi diatur.
“Nya alai, genap kelab enggau gerempung ba Serembu patut regas laban enti nadai program mega tau ngujungka raban nadai bulih penerang bekaul enggau isu.
“Nya kebuah sida mudah tekuing runding laban nadai nerima pekara ke amat sereta saru penemu,” ku iya.
Nya alai, iya ngarap genap kelab enggau gerempung patut besemak enggau raban nya dalam ngatur mayuh program ke bekaul.
Ba pengawa nya, Miro bisi ngungkupka geran Projek Mit Pemansang Menua Pesisir (MRP) penyampau RM5,000 ngagai KSRK dikena ngatur aktiviti.
Dulu ari nya, Miro bisi ngemendarka agih belanja geran projek Transformasyen Menua Pesisir (RTP) penyampau RM100,000 dikena ngaga palan duduk ba gelanggang futsal di Krokong enggau RM10,000 ari MRP ungkup pengawa ngemanah padang main bol Krokong.