GRP, Padum udah ngatur program peransang pelajar di SMK Pakan
PAKAN: Gerempong Raban Pakan (GRP) begulai enggau Gerempung Alumni Graduet Dayak Universiti Malaya (Padum) sereta Sekula Sekondari (SMK) Pakan udah mujur ngatur program pelajar di balai SMK Pakan kena Hari Dua tu tadi.
Presiden GRP Jerenang Jawa madahka batang tuju program tu iya nya dikena mantu raban nembiak sekula ari SMK Pakan nyikap diri napi peresa perintah ti deka digaga ujung taun tu.
Ku Jerenang madah, GRP endang seruran komited dalam mantu ngangakatka status sosioekonomi peranak di kandang menua nya lalu pechaya pelajar nya pekara ti berat dikena nyapai juluk ati sida.
Sida pechaya, program meri peransang tu ti dikangau ‘Beyond SPM, Yes I Can’ ulih mantu sekeda 319 iku pelajar ari SMK Pakan ke deka napi peresa PT3 enggau SPM taun tu dikena nyapai pemutus peresa ti nyulut, pia ku Jerenang.
“Kami ngarapka SMK Pakan deka ngasilka pemutus peresa PT3 enggau SPM ti manah agi enti dibanding enggau taun 2017 lalu udah tentu ngarapka mayuh agi nembiak teulihka A dalam semua subjek,” ku iya nambah.
Nengah pemaik ti diberi, sida ngarapka deka ngatur program ke sebaka taun dudi lalu merambu deka ngaul apai indai dikena nentuka empas ti besai, ku iya.
Kaban Parlimen (MP) Julau Larry Sng ke sama bisi dikangau bejadi program nya madah, bala nembiak sekula dipinta belajar enggau bebendar dikena ngulihka pemutus peresa ti manah lalu mega mujur dalam pelajar.
Dikena meri peransang ngagai raban nembiak ba kandang menua nya ngulihka pemutus peresa ti manah lalu nyambung pelajar sida ba tikas ke tinggi agi, iya udah meri RM1 juta ari baruh Wang Turu Pelajar Larry Sng.
Bala ke bisi dikangau meri licha maya program nya Direktor Palan Pematih Pengajar (IPG) Kampus Rajang Dr. Lambart Lindong ke udah meri licha ‘Nimpai Pemujur Dalam Sekula’, Chairman Padum Olime Janting (Kampong Boys Story) sereta Presiden Gerempung Graduet Dayak Sarawak (SDGA) Dr Dusit Jaul (Pelajar Cemerlang, SMK Pakan Gemilang).
Entara temuai dipebasa bukai ke bisi datai iya nya pengari Opis Pelilih Pakan SAO Yalin Asan enggau Penulung Kanan 1 SMK Pakan Sunang Nyawai.