Statistik taun nyin kemari ngerikodka urung 500 lebih sida ke salah udah ditangkap bekaul enggau penyalah dadah
BINTULU: Bagi Menua Bintulu ngerikod pemujur besai ba pengawa mutarka isu-isu salah guna dadah enggau statistik taun nyin kemari ngerikodka urung 500 lebih sida ke salah udah ditangkap sekalika nya salah ngambi dadah tauka ngidar dadah.
Ketuai Polis Pelilih Bintulu Superitenden Zulkipli Suhaili madah, nengah Akta Dadah Berbahaya (Langkah-Langkah Pencegahan Khas atau LLPK) 1985 taun tu empat iku orang ditangkap laban penyalah ngidar dadah ba bagi menua tu.
“Tu endang siti pemujur ke chukup manah sereta ngarapka pekara tu deka terus dipajak ba pengawa ke dikereja nangkan tu ila nengah Ketuai Bagi Pansik Penyalah Narkotik (KBSJN) ke baru,” ku iya rambau Pengawa Nyerah Nerima Pengawa KBSJN Bintulu ASP Ismuni Umar enggau ASP Muning Jakung ba Bilik Operasyen Indu Opis Polis Pelilih Daerah (IPD) Bintulu semalam.
ASP Ismuni deka gawa nyadi Pemesai Turus Mangku Servis Polis Am Narkotik Indu Opis Polis Kontinjen (IPK) Sarawak di Kuching lalu ASP Muning sebedau tu nyadi KBSJN Padawan deka mangku tanggungpengawa nyadi KBSJN Bintulu ke baru.
Sama bisi datai ngulu pengawa tu Sapit Ketuai Polis Pelilih Bintulu DSP Jame Reis, bala ketuai pampang enggau ketuai balai polis Bintulu.
Zulkipli madah, piak sida ukai semina ngemeratka pengawa mutar isu dadah tang mega begunaka bantu ari opis pemansik penyalah sereta ketuai polis ba renggat baruh dalam mytar aktiviti ke bekaul.
Ku iya, ASP Ismuni udah bebendar nentuka pemujur mutar aktiviti dadah di Bintulu lalu nentuka nama Polis Diraja Malaysia ( PDRM) dipebasaka mensia mayuh.
Nya alai, iya ngarap Ismuni ke deka megai pengawa nyadi pemesai turus ngatur pengawa narkotik deka terus ngembuan kaul ke manah enggau bala pemesai di Bintulu sereta seruran mantu sida ba renggat baruh dikena nentuka pemujur nya seruran betampung ba bagi pengawa narkotik.
“Patah tumbuh lenyau beganti endang udah suah nyadi ba PDRM, aku empay kali udah betukar tanggungpengawa, nyadi pusin pengawa PDTM enggau ba Ismuni udah mandangka pengawa ti manah lebih agi ba bahi pansik penyalah narkotik, mandangka penyulut pengawa, integriti tinggi sekalika ba sukut pemereti enggau pengeransing ngereja pengawa,” ku iya.
Dikena nentuka rikod manah nya terus beretan iya ngarap ASP Muning ulih nguna peneleba iya nampung pemujur lalu ngenampakka nama PDRM sereta meri pengelantang ngagai peranak Bintulu sereta ngarapka pemsai bukai meri sukung ngagai ketuai baru setipak enggau tusun pengawa PDRM ditu.
“Pungkal pengawa, gaga pansik mimit bekaul enggau penanggul sereya pajakka pemujur mutarka isu dadah enggau piak pemberita dikearap terus mantaika berita ke betul sereta enda ngirauka ati mensia mayuh dikena nyelaika mensia mayuh saru penemu bekaul enggau isu-sisu, statistik enggau pekara bukai tang naka tu isu-isu ba Bintulu ulih jaga taja kekadang bisi mega dikerembai enggau kurang betul,” ku iya.
Ku iya, piak sida endang berat amat ke pekara tu lalu genap kami baum kami deka ngemeratka pekara chara mutar isu ukai semina bekaul enggau dadah tang mega penanggul ke nekul mensia mayuh.
Berebak enggau nya, ASP Ismuni madah, mayuh pemujur ke diulih piak kenyau iya ngiring bagi narkotik kenyau ari taun 2014 taja napi mayuh pemar, penusah enggau jaku jai maya ngiring bagi pengawa nya diumba enggau penanggul dadah ke nyadi di Bintulu.
Bekau ari nya ku iya, pengawa jampat udah digaga piak sida dalam mutar penanggul lumur satu ba dunya nya bepun ari taun keterubah (2014) urung 418 pengidar enggau orang gian dadah udah ditangkap lalu didawa ba kort, 2015 (niki ngagai 526 iku), 2016 (455 iku) enggau taun 2017 nyadi taun ngembuan tangkap pemadu mayuh iya nya 575 iku.
“Pengawa jampat dikereja asil saup semua pemesai enggau kaban polis ba Bintulu ngasilka penyampau tangkap ngemayuh nya ba Bintulu lalu ninting taun pengelama empat taun ba narkotik.
“Ba taun 2018 penyampau tangkap bisi kusut tang ba mata mensia mayuh nya tanda ke chukup manah mandangka aktiviti dadah di Bintulu majak kurang sereta mandangka pengawa raban polis chukup mujur,” ku iya.
ASP Muning ba jaku iya mega meri terima kasih ngagai ASP Ismuni bekau rikod ke chukup manah lalu ngarapka iya ulih neruska pengawa enggau manah asil bantu ari pampang bukai dalam ngulihka penerang.
“Enti nadai penerang, tusah deka bejalai laban genap kaban PDRM endang baka diri sebilik lalu penerang ke diberi bekaul enggau narkotik sigi utai ke diguna amat sereta chukup dibasa,” ku iya.