Opis Menteri Pelajar enda patut mantah Jaku English nyadi batang jaku dikena ngajar di sekula
KUCHING: Bala menteri kabinet nengeri ngansak Opis Menteri Pelajar anang kelalu terit pasal ngena Jaku English ke deka dikena nyadi batang jaku ngajar ba sekula, nyentuk ke salah ba undang-undang lalu mandangka Akta enggau Konstitusyen ti ngemendarka pemutus sida.
Datuk Abdul Karim Rahman Hamzah, ke mega Menteri Dagang Temuai, Seni, Main Asal, Nembiak enggau Lumba madah, English nya jaku dunya ti beguna amat lalu bala anak enggau peranak patut diperansang nguasa jaku tu.
“Opis menteri (Pelajar) patut anang kelalu terit nyentuk ke ngelanggar undang-undang ngena Jaku English nyadi batang jaku dikena ngajar ba sekula sereta mantaika Akta enggau Konstitusyen ngambi ngemendarka pemutus sida.
“English iya nya jaku dunya ke beguna amat lalu kitai patut meri peransang ngagai bala anak kitai enggau peranak nguasa iya, tu jaku dagang, lalu semua orang di serata dunya mereti, anang kelalu nitihka asai ati pasal pekara tu,” ku iya.
Iya ngenang pasal Opis Menteri Pelajar, ti mantah pengawa deka ngena Jaku English nyadi batang jaku dikena ngajar ba sekula menua, ti madahka nya ngelanggar Artikel152 (1) Konstitusyen Perintah Besai enggau Akta Jaku Menua 1963/ 67, sereta ngenukuka surat Akta Pelajar 1996.
Tu dikena nimbal Kaban Parlimen (MP) Batang Sadong Nancy Shukri, ti udah minta penetap opis menteri ba sekula Sarawak ngena English nyadi batang jaku dikena ngajar.
Ku iya nambah, pengudah 55 taun megai kuasa merintah diri nengah Malaysia, rayat agi saru penemu pasal ngena Jaku English enggau Jaku Malaysia ti nyadi batang jaku dikena ngajar ba sekula, tambah mega kededua jaku nya bela beguna amat, nya kebuah ngasuh ngelalau tetiap iku peranak Malaysia nguasa kededua jaku, tauka jaku bukai mega.
“Majak mayuh jaku dikuasa orang nya, deka manah agi,” ku iya madah nyemetak.
DAP Bukit Assek Irene Chang madahka penerang (kebuah/dalih) diberi Opis Menteri Pelajar balat ngasuh asa.
“Opis menteri dikeingat ba manifesto bepilih PRU14 Sarawak kitai, Pakatan Harapan udah besemaya enti sema sida mujur numbuhka perintah, bala apai indai ba Sarawak ulih milih sekalika nganjung anak sida besekula ngena Jaku Melayu, English tauka Mandarin, ba sekula ti bisi nyendiaka pilih jaku nyadika batang jaku dikena ngajar.
“Opis menteri diatu patut anang nukar jaku sida tang patut ngiga chara dikena ngamatka semaya ti udah digaga ngagai peranak Sarawak rmaya bekimpin bepilih,” ku Chang ba penerang nya.
Ba pengawa berundingka chara baka ni ngamatka semaya nya, Opis Menteri patut nemu lebuh manifesto dilangkar, semua komponen parti PH ba Sarawak udah nemu pengeran deka mai English pulai baru nyadi batang jaku ngajar ba Sarawak,” ku iya madah nyemetak.
Ku iya, sebagi ari pekara tu berindik ari pengawa ngaku ari baruh Sempekat Malaysia 1963, English patut nyadi batang jaku rasmi ba semua batang pengawa, nengeri tauka perintah besai enggau nadai tatak jam, tambah, tu udah bisi dalam Konstitusyen Perintah Besai ke alai Artikel 161 ngagihka jaku English terus dikena ba Aum Kunsil Nengeri (DUN) kitai enggau ba kort undangundang di Sarawak.
Nitih ku iya, dulu suba, mayuh macham pengawa diuji, nyengkaum nempa jaku English nyadi batang jaku ngajar Matematik enggau Sains, puntan mutarka isu tu ngagai bala nembiak sekula kitai, lalu asil ari nya, mayuh graduet nadai kereja, ti napi pemar mutarka genteran jaku ti betul dalam English.
“Nya kebuah, datai ba maya Opis Menteri nyadi meruan agi enggau holistik ba pengawa sida, kelebih agi ba Sarawak ke alai pengelandik dalam English agi diguna ba kort enggau DUN.
Nyendiaka pilih kedua perintah ti jelan iya tentu deka begunaka timpuh panjai dikena mutarka isu tu lalu deka mantu ngemuntan sereta nagang ngambika rebak biak ulih besemekih ba makit kereja dunya,” ku iya madah nyemetak.
Ku Chang nampung, peranak Malaysia kelebih agi ari Sarawak, alah ba renggat antarabansa ketegal lemi dalam jaku English ba enviromen kereja, ke nyata enggau pengamat udah dikelala sereta diaku Menteri Besai, Tun Dr Mahathir lebuh iya apin lama ke udah, ngerah bala pemesai tetinggi perintah patut ngambi p eresa kompetensi English, dikena nentuka raban gawa perintah tetinggi ulih berandau sereta berunding memanah enggau raban menua luar enti bisi pematut.
Ku iya nambah, siti ari chara ke pemadu manah dikena mutarka pengelemi ba jaku English iya nya berengkah nyendiaka jaku nya nyadi batang jaku dikena ngajar renggat sekula primari, nyemetak madahka chara nya deka nyendia sereta nyikap rebak biak tama ngagai makit kereja.
“Enti amat bisi pengingin deka ngamatka semaya digaga dalam manifesto, konstitusyen enggau undang-undang bekaul engka tau diudah dikena nangkup peminta nya, lalu aku ngansak Opis Menteri berunding lalu anang mali semaya ti udah digaga ngagai peranak Sarawak.”