Kelebih agi ripot bekaul orang dagang ti beambi ulih ba rega barang kenyau ari SST dipejalai kena 1 September tu tadi
KUCHING: Opis Menteri Dagang Dalam Nengeri enggau Pekara Penguna (KPDNHEP) nadai nerima sebarang sebana pasal orang dagang ti nikika rega barang ke enda patut kena Chukai Dagang enggau Servis (SST).
Sapit Menteri iya, Chong Chieng Jen madah, naka ke diatu ndai sebana bekaul enggau caj SST ngagai barang ke enda patut kena chukai ti dipejalaika kenyau 1 Septem- ber tu tadi.
“Naka ke diatu kitai bedau nerima sebarang ripot tauka barang ti enda dilis dibaruh SST tauka barang ke enda patut kena SST.
“Nyema bisi, kitai minta mensia mayuh ti tetemuka pekara tauka barang ti kena SST tang kebendar enda kena (chukai), sida ulih ngentaika sebana nya ngagai opis menteri,” ku iya.
Iya mansutka pekara nya ba aum pengarang berita ti digulu Kaban parlimen Bandar Kuching, dr Kelvin Yii enggau Sekretari DAP Sarawak Alan Ling ba Padang Bilun Antarabansa Kuching ( LTAK) ditu, kemari.
Chong ti mega Kaban Parlimen Stampin madahka, mensia mayuh tauka penguna ulih ngaga sebana nengah aplikasi WhatsApp rasmi opis menteri ba lumur 0192794317.
“Mensia mayuh ulih terus ke portal rasmi KPDNHEP tauka terus WhatsApp ke lumur rasmi 019-22794317,” ku iya.
KPDNHEP muka Bilik Gerakan ti beoperasi 7 pagi ngagai 10 malam enggau tuju ngemutangka penguna ngenataika sebana enggau tanya nengah talian bebas tol 1-800-886-800.
KPDNHEP mega bisi nyendiaka chara bukai baka nengah portal rasmi KPDNKK, emel http://eaduan.kpdnkk. gov.my, SMS ke 15888 enggau naip KPDNKK ADUAN, aplikasi telefon pintar EzAdu KPDNKK sereta ba media rama Twitter enggau Facebook KPDNKK.
Naka ke diatu kitai bedau nerima sebarang ripot tauka barang ti enda dilis dibaruh SST tauka barang ke enda patut kena SST. Chong Chieng Jen Sapit Menteri KPDNHEP