Presiden PKR nangkan semua chalun ke betanding ba penuduk tinggi parti besemekih enggau manah
SIBU: Bala kaban Parti Keadilan Rakyat (PKR) dilalau ngambi anang charut enggau pangan diri ketegal berebutka penuduk dalam parti.
Presiden sida, Datuk Seri Anwar Ibrahim nangkan chalun ke betanding ba penuduk tinggi dalam parti besemekih enggau manah sereta ngira pengering enggau pemujur parti sida.
“Suba kitai nyadi penyakal lalu diatu kitai nyadi perintah. Kitai endang bisi kuasa.
“Aku enggai meda kaban kitai beambi ulih ari pekara tu ngujungka belaya enggau pangan diri ketegal berebutka penuduk.
“Kitai bela patut ingat bakani pemedis kitai ngelama tu nyadi penyakal,” pia ku iya maya bejaku ba pengerami makai lemai PKR Sitak Tengah ditu, malam ensana.
Rambai jaku pengerami nya ‘ Melangkah Ke Arah Kegemilangan Baru Bersama Datuk Seri Annuar Ibrahim’ digulu urung 2,000 iku raban parti ari sitak tengah.
Bela datai maya tu iya nya Mandal Chairman PKR ti mega Kaban Parlimen (MP) Permatang Pauh Nurul Iz- zah Ibrahim, Chairman PKR Sarawak ti mega Menteri Kereja Raya Baru Bian, MP Miri Dr Michael Teo, MP Saratok Ali Biju, MP Sibu Oscar Ling, MP Lanang Alice Lau, MP Julau Larry Sng, ex MP Selangau Datuk Joseph Entulu Belaun enggau chairman komiti pengerami George Chen.
Pengawa bepilih penuduk tinggi PKR deka diatur kena 22 September nyentuk 28 Oktober tu ba serata menua ti mandangka semua penuduk deka dibuka enda nyengkaum penuduk Preisden ti udah dipegai Anwar ke enda dilaban chalun bukai bulan siti tadi.
Anwar mega maya tu madahka iya enggai ngaum chalun ti bediri enda nitihka atur ti udah ditetapka.
Berindik ari nya, iya ngarap chalun ngibun ulah diri, enda belaya, enda bejai pangan sereta enda beanu ketegal ti deka menang.
“Semua ke betanding tu endang Tim Anwar.
“Enti aku bisi ninga rita enda manah, aku enda ngira kita sapa baik nya menang tauka alah. Kitai lebih agi ngemeratka parti sereta enda bechiping,” ku iya madah baru.
Anwar minta bala deligit parti meseti milih pengari ti pemadu manah antara semua chalun ke deka bediri.
Awak tu mega dikena iya madahka bisi tiga iti penuduk Parlimen deka dipilih iya maya Pengawa Bepilih Mit (PRK) enda lama agi sebedau iya pulai baru ke Parlimen bulan Oktober tu.
Taja pia, iya enda madahka bagi penuduk Parlimen ke dipilih.
Kelimpah ari nya, Anwar madah, mayuh pemesai ari menua bukai betanya ngagai iya nama kebuah sanggup begulai enggau Menteri Besai Dr Mahathir Mohamed ti udah nejuka iya dijil suba lalu pekara ke sebaka mega nyadi maya pegai Datur Seri Najib Razak.
“Endang sigi pedis tama pansut ari jil. Tang ku aku nimbal sida, iya ke beguna diatu iya nya aku udah ngampunka Dr Mahathir.
“Nama kebuah? laban aku sayauka menua tu. Aku nyukung enggau penuh pegai Dr Mahathir ti betuaika menua kediatu mayuh utang, makai suap ba dini-dini endur.
“Enti maya udah datai ila, Dr Mahathir pinchin, aku mega minta sukung semua kita ( PH Sarawak) megai penuduk Menteri Besai.
“Sukung tu beguna dikena kitai nentuka perintah ti kering sereta likun,” ku iya nambah.
Anwar madah, iya suah nerima kangau ari pemesai menua luar datai ke menua sida mendingka diri empu pengerembai menua Malaysia ke diatur ti dipegai perintah PH.
Ku iya, sukung rayat Sarawak ngagai chalun PH ke bediri maya Pengawa Bepilih Besai Ke-14 (PRU14) tu tadi tampak mandangka rayat nengeri tu deka ngubah perintah.
“Pemujur tu nyadi bela datai sukung rayat Sarawak baik nya Iban, Melayu tauka China ( sereta kebukai) madahka ‘Enough Is Enough’ deka meda perintah betukar. Diatu semua tu udah nyadi,” pia ku iya.
Dulu agi ari tu, Baru ti mega MP Selangau enggau Kaban Kunsil Nengeri ( ADUN) Ba’kelalan madah, sukung rayat nengeri tu nejuka PH menang 10 ari 30 penuduk Parlimen di Sarawak lalu diatu udah nyadi 12 iti penuduk bepun ari Larry enggau MP Lubok Antu Jugah Muyang nyereta PKR.
“Tu mandangka kitai di Sarawak udah besedia deka berubah. Ba kitai tu nyadi sejarah ngasaika perintah baru sepengudah 61 taun.
“Sebedau tu, Sarawak enda kala ngasaika pekara tu,” ku iya.
Baru mega madahka PH Sarawak patut ngeringka agi penuduk diri ba nengeri tu dikena napi Pengawa Bepilih Nengeri (PRN) ti deka diatur urung tiga taun ti deka datai.
Kitai bela patut ingat bakani pemedis kitai ngelama tu nyadi penyakal. Datuk Seri Anwar Ibrahim Presiden PKR