Kanun Tanah (Ubah) 2018 inisiatif perintah nengeri mutar isu tanah
JULAU: Kanun Tanah (Ubah) 2018 iya nya diputar nengah chara politik ari inisiatif perintah nengeri dikena mutarka isu tanah ditapi peranak bansa asal, kelebih agi hak sida ba Pemakai Menua enggau Pulau Galau (PMPG).
Menteri Muda Kaunsil Kandang Menua, Datu Dr Penguang Manggil, madahka ubah tu udah meri peranak bansa asal hak selama-lama iya ngagai PMPG sida.
Pekara tu ulih nyadi belalauka Seksyen 5(2)(f) ba Kanun Tanah ti ngenukuka PMPG nyadi Native Territorial Domain (NTD), ku iya nerang, seraya nambah, ubah nya, peranak bansa asal menggi hak usufructuary ngagai tanah asal sida.
“NTD tu mega dipinta bansa asal bukai ti ngembuan nama bebida ari nya. Nya kebuah, ubah Kanun Tanah ngemai reti mutarka petalat isu tanah sekali enggau ungkup semua,” ku iya lebuh bejadika Program Randau Gaya Politik Kemaya Hari enggau Tanah NCR begulai enggau bala ketuai renggat baruh ba Balai Komuniti Julau ditu, Hari Lima tu tadi.
Sukat kelingi NTD endang ari tanah NCR tauka sebarang kategori tanah bukai, nya laai, nadai sebarang chara ngurangka pemesai tanah NCr baka ti didawa sekeda raban, ku iya nerang.
NTD 1,000-hektar dikemendar di baruh Kanun Tanah ti diubah iya nya lebih enggau ngelui ari tanah NCR, ku iya madah nyemetak, tambah mega, PMPG tauka NTD sida udah dikod ukai semina diberi kuasa undang-undang aja, tang mega diberi hak ngempu selama-lama iya lalu gelar nya enda ulih dialah.
Sebedau tu, isu tanah NCR udah diputar memanah ari inisiatid sukat kelingi dipunka ex- perintah besai Barisan Nasional (BN), ku iya, seraya nambah, sepenyampau RM30 juta diagih dikena bejalaika renggat kedua pjalai pengawa.
Tang ketegal BN alah ba renggat perintah besai rambau pengawa bepilih besai tu tadi, RM12 juta ari penyampau belanja nya udah dikena, ngujungka sukat kelingi tanah NCR ditangguh, ku iya.
Taja pia, perintah nengeri udah mutus deka nampung sukat kelingi tanah NCR lalu udah setuju agih belanja RM18 juta nampung pejalai pengawa nya, ku iya.
“Nengah inisiatif sukat kelingi nya, tanah NCR udah digazet nyadi rizab komunal asal di baruh Seksyen 6 Kanun Tanah lalu udah nya tay minta magi iya ngagai plot individu ti deka dikeluar enggau pala tanah di baruh Seksyen 18 Kanun Tanah, ku iya nerang.
Pia mega ku iya, Seksyen 28 Kanun Tanah udah diubah manah agi sereta nyamin nadai agi Provisional Lease (PL) deka dikeluar ungkup NTD.
Dulu ari nya, urung 400 iku tuai rumah, bala ketuai komuniti, bala kaunsilor enggau bala kaban Komiti Pemansang enggau Pengelikun Genturung Pendiau (JKKK) ba Sitak Meluan udah mendingka penerang senentang pekara nya ari Pemesai Pelilih Julau, Khalid Andong.
Temegah meda bala ke bisi datai tepantup ati mendingka penerang ti betul senentang NTD, Penguang ngelalau sida minta kenuku tauka penerang pasal pekara ti agi ngasuh sida kakang ati ari Pemesai Pelilih tauka raban bekaul ngarika perintah nengeri.
Iya nangkan sida anang sengapa nerima penerang salah diberi raban nadai tanggungpengawa ti tuju deka ngasut sida ngelaban perintah nengeri.
Penguang ti mega Kaban Kunsil Nengeri ( ADUN) Marudin madahka penerang salah senentang NTD tauka isu PMPG udah ngasuh peranak bansa asal saru penemu lalu pekara ti enda patut nyadi iya nya ngasuh sida tesat rund- ing enggau pengawa ningkah baka ti nyadi ba beberapa endur nyengkaum sitak iya.
Ngelansa pasal gaya politik ba nengeri tu, ku Pengawa, parti megai perintah ari PBB, PDP, PRS enggau SUPP diatu udah begempung di baruh Gabung Party Sarawak (GPS) pengudah sida ngaga pemutus ningkilka diri ari BN apin lama ke udah.
GPS deka nyendiaka sida pelasar dikena mantaika peminta enggau bejaku nadai nangi negika peminta Sarawak enggau peranak iya, kelebih agi minta pulai kuasa otonomi di baruh Sempekat Malaysia 1963 (MA63) ti udah lenyau ngelama tu, ku iya.
Iya minta peranak Sarawak bediri teguh di belakang GPS lalu ukai parti ari Semenanjung ti gawa negika peminta sida.
ADUN Meluan, Rolland Duat, ba jaku ngelalu iya madahka iya udah ngangauka Penguang meri penerang senentang isu PMPG laban iya siku ari kaban gawa khas ti ditumbuh perintah nengeri dikena mutarka isu PMPG.
Ari penerang betul dikunsi Penguang, iya ngarapka peranak Meluan deka ngenang pengelurus perintah nengeri gawa mutarka isu tanah peranak bansa asal ti pemadu sensitif, ku iya.
Rolland mega ngena awak nya mantai belanja pemadu baru dikemendarka perintah nengeri penyampau RM10 juta dikena ngaga Jematan Sungai Meluan begulai enggau RM79 juta dikena ngemanahka sistem bekal ai ba kandang menua nya.
Antara bala bisi datai Sekretari Politik Kepala Menteri, Alexander Asing enggau Petrus Igat sereta Ketuai Polis Pelilih, DSP Bidol Noyeng.