Pemeresi Rumah Asap Sibu Jaya patut ditunda palan makai ke bukai
SIBU: Rumah Asap Sibu Jaya enggau rampa iya ti lantang enggau beresi sereta mega nyendiaka mayuh macham bansa pemakai dipanggang tau ditunda rumah asap bukai kelimpah nyadi pematak bala temuai.
Kaunsil Pelilih Menua Pesisir Sibu (SRDC) bejadika pengawa ngelanchar rumah asap kena Hari Empat tu tadi dikena nyendiaka rampa ti lantang agi ngagai bala pedagang enggau sida ti rinduka pemakai dipanggang.
Kaban Kunsil Nengeri (ADUN) Bukit Goram, Jefferson Jamit Unyat dipebasa bejadika pengawa nya. Bisi 10 iku pedagang ti disedia enggau bansal sereta penyikap perengka guna bukai ari raban SRDC.
“Rumah Asap Sibu Jaya ti diadu memanah, beresi enggau lantang sereta nyendia bemacham pemakai dipanggang ulih nyadika chunto ngagai rumah asap bukai,” ku Jamit.
“Tu ulih nyadi pematak ngagai sida ti rinduka pemakai dipanggang ukai semina ari Sibu Jaya aja, tang mega ari pasar Sibu, Kanowit, Julau enggau endur bukai. Tambah mega, rumah asai tau nyadi pematak temuai kelebih agi pemakai dagang temuai.
Ba pekara tu, iya meri sukung ngagai SRDC dikena nyendiaka perengka guna meruan baka bangsal enggau penyikap bukai ngambika mantu bala pedagang tu.
Jamit mega muji raban kaunsil ketegal pengawa sida nyendiaka awak ngagai rayat ngiga belanja lebih ari dagang bepanggangka pemakai tu.
Rumah asap ulih nyadi pemansut belanja ti manah ngagai sida dikena nangkup peminta besehari sehari sereta nampung belanja sida sebilik, berindik ari pemar ba ekonomi dunya,” ku iya nambah.
Ngelansa pasal mengeri Sibu Jaya, Jamit bechunto baka mengeri iya empu, Kapit laban mayuh peranak diau ba Sibu Jaya datai ari Kapit, Song enggau Katibas.
“Mayuh sida meli rumah lalu diau ba Sibu Jaya. Tu mengeri ke idup sereta jampat mansang.”
Iya berasai lantang beratika pemanah rampa enggau mega rumah kedai moden ti baru, ngasuh Sibu Jaya nyadi endur ti manah endur diau sereta bedagang.
“Sibu Jaya bisi lebih agi tiga buah palan besai bebelika barang kelimpah pak kupi, restaurant, bangsal pemakai, makit, pasar tamu, pasar minggu enggau rumah asap.
“Aku ngarapka SRDC deka seruran nampung inisiatif enggau pengawa ti manah tu dikena mantu bala operator pemakai tu ngepunka dagang sida. Aku mega ngarapka dudi hari, SRDC ulih nirika palan pemakai – begulaika pengawa bepanggang, bangsal pemakai, utai pakai enggau ai irup ba siti endur. Tu deka nyadi pematak bukai ngagai mengeri tu,” ku iya meri langgur penemu.
Seraya Chairman SRDC, Sempurai Petrus Ngelai ngelalau 10 iku operator rumah asap ngena memanah perengka guna ti bisi disediaka raban kaunsil ngambika sida ulih besemekih ba dagang pemakai dipanggang sida.
Iya nyemetak madah semina sida ti bisi pengeran deka teulihka asil ari pemujur.
“Nya alai, ari rampa ti beresi enggau pemakai manah, sida ulih matak bala bukai datai ngusung bangsal sida. Tentuka pekara pemeresi enggau manahka pengerai ba pengawa mela enggau ngintu pemakai nyadi pekara ti beguna amat, titihka atur diteritka raban kaunsil nyadika sanding,” ku Sempurai madah ba jaku ngelalu iya.
Iya nikalka kenang bala operator rumah asap Sibu Jaya berengkah enggau langkau arau sebedau rambau Gawai Dayak Bazaar.
Udah nya, dagang sida majak nerima timbal manah agi enggau peminta ari peranak Sibu Jaya, sida minta diri bedagang ninting hari, ku Sempurai.
“Rumah asap mega sebagi ari agenda Local Key Result Areas (LKRA) ba pengawa nempa awak dagang ngagai peranak di baruh pelin strategi kaunsil enggau balanced score card, nambahka pasar malam ungkup peranak Sibu Jaya ngulihka penatai pemisi tambah ari dagang pemakai.
Nangkan nya, iya muji bala pengatur enggau komiti rumah asap Sibu Jaya ti udah ngaul kerejasama rat enggau raban kaunsil nirika endur ti lantang sereta meruan ungkup bala pedagang enggau mensia mayuh.
Sempurai mega muji Chairman Pengatur, Kaunsilor Jeffrey Nuing enggau Chairman Komiti Rumah Asap Sibu Jaya Welson Maling Bayang.
Sama bisi datai rambau pengawa ngelanchar Sekretari Politik Kepala Menteri Daniel Bujal enggau Sapit Chairman SRDC Kaunsilor Robert Lau Hui Yew.