Projek Pan Borneo mansa Brunei patut ditampung seraya nganti jalai baru
LIMBANG: Perintah Pakatan Harapan (PH) patut nampung perambu ngaga projek Jalai Besai Pan Borneo ti disetuju nujah Brunei sebedau tu seraya nganti jalai baru Pan Borneo digaga nyambung kandang menua ulu adap Utara nengeri tu.
Kaban Kunsil Nengeri (ADUN) Batu Danau Paulus Palu Gumbang madah jalai gaya pejalai ba jalai Pan Borneo ti disetuju perintah sebedau tu udah dikelala lalu semina nganti kereja ngaga aja ti ulih ngemandakka jam enggau penyauh pejalai dibida jalai baru nya.
“Kitai enda nagang langgur Perintah PH deka ngaga jalai Pan Borneo enda mansa Brunei dikena nyambung kandang menua ulu.
“Taja pia, seraya nganti projek nya dipejalai, kitai ngarapka jalai ti disetuju sebedau tu ulih digaga seraya nganti ngaga jalai baru nya,” ku iya lebuh dirandau pengarang berita pengudah program beripai nyeleti rumah peranak seranta ti idup sebatang kara, Mai@Dom Bujang, 50, ari Rumah Ajut diatur SABERKAS Batu Danau Unit Hulu Pandaruan/Kubong kemari.
Paulus mansutka jaku nya lebuh ngelansa pemutus Menteri Besai Tun Dr Ma- hathir Mohamad senentang projek Jalai Besai Pan Borneo ti nyambung Sarawak enggau Sabah nadai mansa Brunei.
Dr Mahathir kena Hari Satu tu tadi rambau program tanya saut pengudah ngenataika licha ba Universiti Brunei Darussalam madah, Malaysia enggau Brunei ke amat setujuka projek Jalai Besai Pan Borneo enda deka digaga mansa Brunei.
Pengawa setuju nya ku iya, dicapai ba randau antara iya enggau Sultan Hassanal Bolkiah ti diatur di Istana Nurul Iman beserimbai enggau pejalai gawa iya ngagai menua nya.
Ku Paulus, jalai lama ti disetuju sebedau tu patut ditampung laban gaya jalai udah ti ditengah udah dikelala seraya berundingka jalai baru ti deka begunaka timpuh lama bejalaika kereja servey, nyukut enggau ke bukai.
Ba lansa bukai, Paulus ke mega Chairman SABERKAS Batu Danau madah, bemacham program dipejalai nyelinting raban nembiak chakah ngaul diri sereta ulih gawaka pemansang ekonomi komuniti ba menusa sida empu.
Program ngintu pengelantang enggau komuniti di baruh SABERKAS Batu Danau ku iya, diatur dikena mantu raban seranta sereta timpang pendiau.
Sepenyampau RM5,000 dibelanja ungkup ungkus nyeleti rumah nya.
Kelimpah ari program ngintu pengelantang enggau komuniti, bemacham program bukai diatur nyengkaum Hari Ruang Bilik SABERKAS Batu Danau kena 16 September enggau Pekit Main Bol ngerebut Mangkuk Ketuai Komuniti dalam bulai Oktober.
Sama bisi datai Sekretari SABERKAS Batu Danau Jimmy Ngindang, Penghulu Kr Ekit Awang sereta bala kaban SABERKAS Batu Danau.