Tinggal dua buah sekula repuk empai tembu digaga ngena IBS
SIBU: Tinggal dua buah ari 50 sekula empai tembu digaga nengah Projek Ngaga Baru enggau Ngemanah Sekula Repuk renggat keterubah di nengeri Sarawak.
Menteri Kereja Raya Baru Bian madah, projek tu digaga nengah chara Industrialised Building System (IBS) bekenaka ungkus RM138,458,260 tu dipejalaika Opis Kereja Raya (JKR) ti berengkah digaga ba pengelama empat bulan.
“Tang ketegal bepanggai ba kontrik beberapa bengkah projek diberi timpuh panjai agi.
“Iya ke dua buah bedau tembu nya deka tembu tengan bulan tu,” pia ku iya madah maya aum media, ensana.
Dulu agi ari tu iya bejadika projek nya di SK Ulu Sungai Salim ditu.
Sama bela datai maya tu iya nya Direkter JKR Pampang Pelajar Dato Ir Ahmad Redza, Sapit Direkter ( Bangunan dan Pakar) Nengeri Stanley Chai enggau Kepala Pengajar SK Ulu Sungai Salim Dayun Jackson Bunsie.
Nerang enggau nyemetak, Baru ti mega Kaban Parlimen Selangau, projek renggat keterubah nya mungkur 13 iti pakej enggau 13 kontriktor ti nyengkaum ngaga 294 kelas, 12 buding, tujuh bilik sains, 28 blok agu enggau enam balai makai.
Ba serata Malaysia ku iya, perintah nyendiaka ungkus RM2.5 billion ngaduka projek nya dalam kandang dua taun ti dibagi ngagai RM500 juta un- gkup Semenanjung Malaysia, Sabah (RM1 billion) enggau Sarawak (RM1 billion).
“Di Semenanjung, projek renggat keterubah tu dikemujurka JKR lalu di Sarawak enggau Sabah diaduka JKR enggau Opis Pelajar Malaysia (KPM).
“Iya ke digaga KPM di Sarawak, perintah ngungkupka RM278,118,000 dikena ngaga projek ba 66 buah sekula lalu di Sabah, KPM mega diungkupka RM266,300,000 ngaga 83 buah sekula,” ku iya madah baru.
Baru madah, projek renggat keterubah di Sabah mungkur 37 buah sekula enggau 12 pakej sereta 12 kontriktor ti nyengkaum ngaga 277 kelas, 37 bilik Sains enggau 42 blok jamban.
“Projek ke digaga nengah IBS tu ulih digaga ba timpuh ke enda lama enti dibida enggau chara ke sebedau tu.
“Ngarapka semua pengiruh enggau pengeransing deka semampai ditanggang dikena nentuka genap iti projek enggau program pemansang ulih dipejalaila enggau lengkas, mujur sereta mai pemaik ngagai pengidup rayat,” pia ku iya madah.
Iya madah, piak perintah ke baru diatu nemu bendar agi mayuh sekula repuk ukai semina di Sarawak aja tang ba nengeri bukai patut diaduka enggau lengkas.
“Taja pia, semua projek deka dikemujurka magang bepanggai ba belanja kitai,” ku iya.
Projek SK Ulu Sungai Salim ti dipenyadi sehari nya udah tembu kena 27 Jun 2018 lalu projek diserah ngagai Opis Pelajar Nengeri kena 31 Julai tu tadi.