Pengawa lumba enggau main endang ukai ungkup tuju politik: Nanta
KUCHING: Pengawa lumba enggau main sigi ungkup semua orang lalu ketegal nya anang ngumbai iya ungkup tuju politik, ku Kaban Parlimen ( MP) Kapit Datuk Alexander Nanta Linggi.
Sekretari Besai Gabungan Parti Sarawak ( GPS) nya pechaya, penyerakup enggau pengelantang genap pupu bansa ulih dinan nengah lumba enggau main.
Berindik enggau nya, Nanta gaga enggau sambut bala penyereta ti ngarika mayuh etnik Dayak ba Pekit Badminton Ke-8 Mangkuk Presiden Sarawak Dayak National Union (SDNU) ke diatur di Palan Lumba enggau Main Sentosa ditu.
Rambau bejadi pekit nya ensanus (Hari Enam), Nanta ke mega Sapit Presiden SDNU nyuaka geran perintah penyampau RM10,000 ngagai Komiti Pengatur enggau Teknikel Badminton SDNU ngambi tau dikena ngatur edisi ke semilan pekit ba taun ti deka datai.
Mandal Presiden SDNU Churchill Edward Drem ti ngarika Chairman Pengatur Pekit Datuk Paduka Anthony Nait Mani meri terima kasih ngagai semua penyereta ti udah meri sukung ngagai program ke udah diatur SDNU ninting taun.
Tujuh belas tim bepekit ngerebut gelar champion kelimpah ti ngerebut perais mata duit, lalu sekeda penyereta datai ari Kapit.
Pekit mega nyendia kategori ungkup orang indu ke alai 14 tim ‘double’ orang indu bepekit ngerebut gelar champion sereta perais mata duit.
Bela datai Sekretari Politik Kepala Menteri Maurice Giri enggau Presiden Kelab Badminton Kenyalang (KBK) Petrus Ngalih Tingi.
Ba pekit nya, SDNU minta saup KBK nyendia servis ke bekait enggau pekara teknikel.
Perais ngagai pemenang deka disua ba pengerami makai lemai, malam tu (Hari Satu) di Awah Cafe, Palan DBNA ditu lalu deka digulu sekeda raban pengari rayat ari GPS.