Pekit Pidato ke diatur (UB) Iban pelasar ngerembai, ngangkatka jaku bansa
KUCHING: Jaku Iban enda tau enda dikerembai ngambika jaku nya idup belama kelebih agi ba nembiak rebak baru bansa Iban.
Ke pemadu manah, pengerindu ngena jaku nya patut dikemeran berengkah nembiak ba sekula primari, ngambika nembiak rebak baru bisi penegap ba jaku bansa diri.
Madah munyi tu, siku ketuai komuniti ke mega ex- Kepala Pengajar, Tuai Rumah Billy Spencer ti ngarapka Pekit Pidato Jaku Iban ke deka diatur Utusan Borneo Bagi Iban dalam bulan Oktober tu ila, nyadi pelasar ke pemadu manah alai pesereta mantaika penemu enggau penuai runding diri, kelimpah negap sereta ngerembaika jaku Iban.
Ku iya, enti kitai bisi penegap ba jaku bansa diri, bansa bukai deka bebasaka jaku enggau bansa Iban.
Ambika banding ku iya, nembiak bansa Iban tauka rebak baru ke diau di mengeri diatu kurang landik ba jaku bansa diri. Nya kebuah sida patut ngena platform tu nambahka pengelandik sereta negapka jaku asal sida empu, ku iya.
Nengah peneleba enggau pengelandik ba jaku bansa diri,nya nyaup bansa kitai ngetanka jaku Iban ngambika enda punas sereta alah laban jaku bansa bansa bukai.
Baka aku empu, aku rindu mending lalu meda jaku Iban ti taburka nengah radio tauka dipansang ba Televisyen. Taja pia, baka ba televisyen nya bisi tatak timpuh. Slot (airtime) ungkup program Iban patut ditambah mayuh agi, lalu baka nya mega program bukai baka program pemerindang, berita, dokumentari enggau ke bukai patut dikemayuhka agi, ku iya.
Nengah awak tu, iya meransang semua bansa Iban kelebih agi bala nembiak sekula enggau masuk pekit, laban nya ukai semina pulaika pemaik sida tang mega pemaik ngagai jaku bansa Iban.
Iya mega meri puji ngaga bala exco komiti pengatur Pekit Pidato Jaku Iban nya laban ngembuan inisiatif deka negap, ngerembai sereta ngangkatka jaku bansa Iban.