Bas kuasa hidrogen dipelaba berengkah dikena di Kuching bulan Mac taun baru
KUCHING: Tiga buah bas ti nguna kuasa gis hidrogen disadang dikena di mengeri Kuching ba bulan Mac taun baru.
Kepala Menteri Datuk Patinggi Abang Johari Tun Openg madah ketetiga bas nya nyadika projek pemungkal ngambi tau dikena ngangkatka sistem pengangkut di Sarawak.
Bas hidrogen nya deka disedia kompeni pemansut ari China, Foshan Feichi Automobile Manufacture Co. Ltd. lalu deka diintu begulai enggau Gempung Pemansang Ekonomi Sarawak (PPES).
“Jaku puji ngagai PPES enggau Foshan Feichi Manufacture nengah kerejasama ngaga pansik ba atur nguna hidrogen nyadika kuasa ba juluk kitai ti deka ngangkatmanah sistem pengangkut ditu.
“Tu seriris enggau juluk perintah ti deka nyendia sistem pengangkut nguna pengeraja asal hidrogen,’ku iya.
Iya mansutka jaku nya ba pengawa nyain Sempekat Pemereti (MoU) entara PPES enggau Foshan Feichi Automobile ungkup tuju mekal gis hidrogen ke Sarawak, ke alai pengawa diatur di sebuah hotel ditu, kemari.
Ngepunka operasyen nya ila, Abang Johari madah servis bas nya enda ngeletakka sebarang bayar ngagai semua nyengkaum orang ari menua bukai ke datai nemuai kitu.
Ngenang kaul ke sama, Abang Johari madah Sarawak Energy (SEB) diatu benung ngaga stesyen ngisi gis hidrogen di Bintawa ngambi tau dikena bas nya jemah.
“Pengudah stesyen tu bisi, kitai ukai semina ulih ngemansutka gas hidrogen tang mega ulih nyual gis tu jemah ila.
“Aku pechaya kitai ulih nyadi nengeri pemansut gis hidrogen ketegal ti ngembuan mayuh ai baka ke dipalan tekat ai Bakun, Murum lalu pia mega Baleh ke benung digaga,” ku iya.
Ba pengawa nya, Chairman PPES, Tan Sri Datuk Amar Abdul Aziz Husain madahka atur nguna sistem perengka pengangkut ke ulih ngintu pemanah ikas angin nyadi siti pelin timpuh panjai perintah nengeri.
Ku iya, pekara nya seraris enggau gaya maya ke diatu ke nyadi di serata dunya ke alai pemaik rampa menua nyadi pekara ke dulu dikemerat.
“Perintah nengeri amat keran deka ngemansang atur nguna hidrogen ke nyadi kuasa alternatif ketegal ti nyendia kuasa ke beresi, efisyen enggau mudah ungkup timpuh panjai,’ku iya.
MoU disain Manager Besai PPES, Soedirman Aini enggau manager Besai Foshan Feichi Automobile, Jiang Yong.