Pengagit gawa beripai meseti diterenak ba raban PIBG, JKKK
KAPIT: Pengagit gawa beripai meseti diterenak enggau dikemeran antara raban Gerempung Apai Indai enggau Pengajar ( PIBG) enggau genturung pendiau tauka Komiti Pemansang Enggau Pengelikun Genturung Pendiau (JKKK), maya bejalaika pengawa projek mit ngemanah ba sekula tauka rumah panjai, pia ku Kaban Kunsil Nengeri Pelagus, Wilson Nyabong Ijang.
“Semengat gawa volunteer enggau ngaul diri nerenakka asai ngempu enggau siruka bala komuniti kitai. Aku chukup lantang ati meda pemanah timbal (penyampau tubuh) ke datai ba projek beripai nyemin, nyeleti enggau ngangkat manahka jalai semin ke bisi nyambung Sekula Primari (SK) Nanga Antaroh ari simpang Jalai Antaroh, Sut ditu.
“Penatai bala kita ngayanka pengeran kita gawaka sekula besemak enggau rumah panjai kita ti nyendiaka pelajar ngagai bala anak. Begulai kitai ngintu palan pelajar tu ari pengawa mantu enggau kerejasama rat ngagai raban sekula dikena nentuka bala anak ulih belajar ba rampa ti lantang,” ku Nyabong.
Iya mansutka jaku rambau atur projek beripai ujung minggu tu tadi diatur ba SK Nanga Antaroh, Sut, ngalitka lubang ba jalai semin ari simpang Jalai Antaroh nuju ke sekula.
Rengka dikena ngaga nyengkaum dua trak ngulai semin, tiga iti kelebat, BRC, batu,pasir, papan kayu, enggau ke bukai ti dipelanja ari baruh Projek Mit Pemansang Menua Pesisir (MRP) Nyabong.
Sekretari Politik Kepala Menteri Sarawak, Nicholas Kudi Jantai, Pemantu Pengatur Pengawa Nyabong, Wallace Paul Hitler, Kepala Pengajar sekula, Baling Unan sereta bala kaban PIBG antara bala bisi datai ngulu pengawa beripai nya.