Dr Penguang asa nadai bansa Iban, Melayu ba rintai Kabinet Perintah Besai
MARUDI: Menteri Muda Kaunsil Kandang Menua, Datu Dr Penguang Manggil udah bekunsika pengasa diasaika iya enggau bala komuniti menua pesisir ditu ti kurang bansa Iban tauka Melayu ari Sarawak ba rintai Kabinet Perintah Besai.
Iya mega asa nadai pengari komuniti Iban ari Sarawak, pia mega Melayu ba kabinet baru.
“Menteri Besai Tun Dr Mahathir Mohammad madah iya deka nyangkung, bisi menteri ari semua bansa dalam kabinet Perintah Besai ke baru.
“Diatu, nadai siku pan bansa Iban, tauka Melayu Sarawak udah dipadu nyadi menteri ba kabinet. Tu keterubah iya kenyau ari Malaysia ditumbuh, Iban tauka Melayu ari Sarawak enda dipasuk ba rintai Kabinet Perintah Besai,” ku iya.
Dr Penguang, ke mega Kaban Kunsil Nengeri (ADUN) Marudi madahka pekara tu ngagai peranak Rh Nuing Nyalu Sg Laong, Bakong, semak ditu, lebuh ke nemuai ngagai rumah panjai Iban nya, apin lama ke udah.
Ku iya, bansa Iban enggau Melayu, lebih ari setengah ari penyampau peranak Sarawak enda diberi sebarang kelala sereta dikelaung ari kabinet Perintah Besai.
“Pekara tu chukup ngasuh ati sinu ngagai Sarawak,” ku iya nambah.
Dr Penguang mega ngelalau komuniti menua pesisir ngena pemintar runding sida sebedau meri sukung ngagai sebarang parti politik, kelebih agi parti ti ukai tumbuh ari Sarawak.
“Peminta enggau nasit dudi hari nengeri tu pemadu manah ditentuka kitai empu,” ku Dr Penguang.
Dr Penguang mega mantaika pengasa diri laban mayuh projek kelebih agi ba kandang menua pesisir udah tejanggal.
Berebak enggau nya, Dr Penguang mega bisi ngemendarka agih belanja penyampau RM15,000 enggau RM5,000 ari geran Projek Mit Pemansang Menua Pesisir (MRP) ngagai Komiti Pemansang Enggau Pengelikun Genturung Pendiau (JKKK) enggau Biro Indu rumah panjai nya.
Sama bisi datai, bini Dr Penguang, Datin Monica Ukong, Sekretari Politik Kepala Menteri Alexander Asing Sadai, Chairman Kaunsil Pelilih Marudi ( MDC) Kaunsilor Edward Mendai, pengari ari Opis Menteri Kaunsil Kandang Menua enggau Pengawa Berumah Sarawak Leonard Law, Pemancha Enggah Nuga, Penghulu Buan Gelunggan sereta sekeda bala ketuai komuniti ba Sg Laong.