Penanggul buding repuk ba empat sekula di Sri Aman udah dikenatai ngagai Dr Maszlee
KUCHING: Pekara rumah buding repuk ba empat buah sekula sekondari ba Bagi Menua Sri Aman udah dikenataika ngagai Menteri Pelajar, Dr Maszlee Malik.
Mandal Chairman Parti Tindakan Demokratik (DAP) , Leon Jimat Donald madahka diri udah madah ngagai Maszlee senentang pekara nya rambau pengerami makai lemai diatur Pakatan Harapan Sarawak ungkup bala menteri nya kena Hari Empat tu tadi, beserimbai enggau penemuai gawa keterubah iya ngagai nengeri tu.
Ku Leon, empat buah sekula tu iya nya Sekula Sekondari (SMK) Simanggang, SMK St Luke, SMK Melugu enggau SMK Engkilili.
“Sekula tu beguna mayuh seleti enggau kelas patut mega dikemanah,” ku Leon lebih dirandau kemari.
Pia mega ku iya, lebuhka berandau, bisi mega nyebut Sekula Primari (SK) Chung Hua Simanggang, sebuah sekula primari China ba Sri Aman.
Nitih ku Leon, nisbah bala pengajar ngagai nembiak ba sekula nya tinggi amat, 1:50 lalu tu semina ngagai kelas Primari Satu aja.
“Aku madah ngagai iya ngambika mantu kitai ba Simanggang ari pengawa ngaga mayuh agi kelas laban ukai semina bansa China aja nganjung anak sida besekula ba SK Chung Hua.
“Mayuh bansa bukai baka bansa Dayak enggau Melayu mega nganjung anak sida besekula dia laban bisi standard tinggi ba pelajar lalu apai indai tebal agi dekaka bala anak sida nguasa Jaku Mandarin,” ku iya.
Leon, ke nyadi Ketuai Pampang DAP Sri Aman, mega udah nyuaka surat ngagai Maszlee ti ngundan langgur penemu ngemanahka sistem pelajar nasional.
Antara langgur penemu iya nya nyerenih baru sistem penuduksekula, ngetanka Palan Pematih Pengajar (IPG) Kampus Rajang enggau Miri, sereta mega ngambi gawa bala pengajar interim.
“Aku mega bisi madah ngagai iya pasal sekula sekondari nyadi ti jematan pemadu beguna ungkup pelajar tinggi, ti deka nentuka kuing pengidup bala anak kitai dudi hari. Nya kebuah kitai anang nejuka pelasar palan pemansut alai runding ke pemadu manah di menua kitai,” ku Leon nambah.