Program pemansang main bol menua pesisir dikearap ulih ngangkatka standard pemain bol di negeri tu
BINTULU: Batang tuju program pemansang main bol menua pesisir deka nyidi sida ti landik di menua tu diambi bemain ba tikas tinggi agi kelebih agi ari kandang menua pesisir ti patut dikerembai ngagai bagi menua bukai ba Sarawak.
Menteri Bekal Ai enggau Elekterik Menua Pesisir Dato Sri Dr Stephen Rundi Utom madahka Serakup Main Bol Bintulu (BIFA) udah dilempaika pengarap ngatur pekit main bol ngagai raban nembiak menua pesisir ba Bintulu ungkup taun kedua.
“Enti ulih, semua bagi menua enggau serakup main baru ba Sarawak ulih nunda model tu lalu nyadi sebagi ari transformasyen main bol nengeri,” pia ku Kaban Kunsil Nengeri (ADUN) Kemena madah rambau aum pengarang berita ba pengawa bejadika Program Pemansang Main Bol Menua Pesisir 2018 ba Hotel Parkcity Everly kena lemai Hari Minggu.
Pengawa nya mega diatur beserimbai enggau main final Pekit Main Bol Raban Nembiak Menua Pesisir antara tim Mukah enggau Kuching ti deka berebutka Mangkuk Dato Sri Dr Stephen Rundi Utom.
Ku Rundi, meseti bisi pengawa patut dikereja dikena ngemanahka kualiti pemain bol nengeri lalu mulaika baru pegari nama pemain bol Sarawak.
“Naka ke diatu, standard main bol kitai bedau ulih matak sida ti rinduka main bol enda baka lebuh ‘ngap sayot era’, ke alai kitai bisi penyukung ti kering,” ku iya.
Rundi madahka pengawa ngemanahka main bol nengeri ukai semina datai ari kualiti sida ti ngatur pengawa matih, pemain enggau penyukung ti kering aja, tang bisi raban melanja ti meruan ari sektor peribit mega beguna amat dikena ngidupka baru main tu.
“Diatu kitai ukai semina fokus ba pengawa nyidi sida ti bepenau main bol ba kandang mengeri, tang kitai mega ngatur pekit ungkup raban nembiak kitai ba menua pesisir.
“Aku udah nyukung pengawa tu kenyau ari tujuh taun ke udah ari nempa mangkul main bol aku empu lalu aku deka seruran meri sukung tegut ngagai aktiviti ti ulih meri pangka positif ngagai ngangkatka raban nembiak kitai.
“Aku pechaya pengawa tu ulih nyaup ngangkatka agi standard main bol kitai, enti kitai enda nyidi sida ti bisi penau ari semua, kitai deka lenyau bala pemain bepenau tu ti bisi juluk deka bemain ba tikas tinggi agi,” ku Rundi.
Iya nyemetak madahka tetiap iku pemain bol meseti bisi juluk besai lalu juluk besai tu semina ungkup sida ti bisi ati besai, kelebih agi sida ti deka nyulut ba idup.
BIFA nyuaka tujuh gelar lumba lemai nya lalu bala penerima iya nya Shamsuddin Tuah ( Pengadil Ke Pemadu Nyulut); Ibrahim Tahir ( Jurulatih Ke Pemadu Nyulut 2017- 2018); Awang Nazmi Syamel Awang Ismail ( Most Promising Player); Sylvester Laing Lihan (Penyaga Gol Ke Pemadu Nyulut); Mohd Zharif Zulkamal Mahdar (Pemain Pemadu Nyulut); Murum Team (Tim Main Bol Menua Pesisir Pemadu Nyulut 2017); SMK Bakun enggau SK Kidurong (Gelar Sekula Khas 2017-2018).
Rundi mega ngarapka ari gelar nya, bala pemain bol nyentuk kea raban ngatur pengawa tetinggi deka bisi peransang gawa bebendar agi lalu nampung pengawa ngangkatka penyapai sida.
Iya mega pechaya ari ngemai kaul raban nembiak ngaul diri ba aktiviti lumba, ke amat tu deka meri awak ngagai sida nambahka pengelandik diri lalu nyeliahka sida ari ngaul diri ba penanggul rama.
“P e n g a w a n g e - mansangka raban nembiak nyadi siti pemar ngagai semua kitai, lalu kitai, bala apai indai Serakup Apai Indai enggau Pengajar (PIBG) enggau bala pengajar patut bejalaika pangku pengawa diri empu enggau meruan,” ku iya nambah.
Sama bisi datai ngulu aum pengarang berita nya, ADUN Samalaju Majang Renggi, Presiden BIFA Duke Janteng, Menijar CSR Sarawak Energy Sdn Bhd Jiwari Abdullah, sereta Menijar Besai Lea Sport Centre Sarawak Raymond Sim.