JKKK platform ke manah dikena mutarka penanggul tanah NCR
MIRI: Peranak menua pesisir dilalau nguna Komiti Pemansang Enggau Pengelikun Genturung Pendiau (JKKK) sida memanah nyadika pelasar mutarka pekara bekaul enggau sebarang isu nyengkaum tanah NCR sida.
Menteri Muda Kaunsil Kandang Menua, Datu Dr Penguang Manggil, ti nibarka jaku lalau, madahka tu dikena nyeliah sebarang pekara bebalut tauka penyarut antara serakup sida enggau JKKK sereta mega dikena nentuka pekara pengelantang enggau peminta bala komuniti genturung pendiau diperatika.
Dr Penguang mansutka jaku ba mua bala tuai rumah ari empat buah rumah panjai ari Sungai Buri di Bakong,semak ditu, nyengkaum Tr Peter Sujar, Tr Nora Ree, Tr Kam Pasu enggau Tr Gasah Tadong ba sebengkah randau ke diatur ba Palan Servis ADUN N76 Beluru, apin lama ke udah.
Sama bisi datai bala kaban Serakup Peranak Buri, Pemancha Enggah Nuga, Penghulu Buan Gelunggan enggau Chairman Kaunsil Pelilih Marudi ( MDC) Kaunsilor Edward Mendai.
Batang tuju randau nya ngiga chara mutarka penyerekang penemu antara empat buah rumah panjai ba tanah sida ti udah digazet enggau dikemansang bisi 20 taun ke udah.
Dr Penguang ngelalau empat iku Tuai Rumah ngena pengelandik sereta berunding memanah enggau pemaju ladangngambika bela teulihka penguntung ti tau mai pemaik ngagai tanahenggau peranak rumah panjai.
“Bala kita tau minta servis CSR ari bala pemaju,” ku iya nambah.
Iya mega ngansak peranak begempung sereta besaup mutarka sebarang penanggul ti ditapi dikena ngemansangka kandang menua sida.
“Badu ngenang pekara ti udah nyadi. Atur aum lalu datai ba sempekat antara semua empat buah rumah panjai, baka ni kita deka mutarka penyerekang penemu sentang isu tanah tu ba kita empu sereta mega enggau kompeni ladang.
“Anang malutka isu tu enggau politik ti tau ngasuh charut, manah agi fokus ba pekara ti beguna amat ba pengidup kita,” ku iya nambah.
“Iya mega nangkan sida anang mantaika pengeringat diri ba surat berita enggau media rama laban nya tau ngasuh pekara bebalut agi.
Ba randau nya, Dr Pen- guang mega mantaika langgur penemu iya deka numbuhka komiti tanah NCR ba sitak menua dipegai iya.
“Tuju komiti tu iya nempa pengkalan data ari semua rumah panjai enggau penanggul tanah baka nya sereta mantu sida ngiga chara enggau reti mutarka isu nengah jalai ti patut ari ke ngena kort.”
Dulu sebedau tu dalam taun tu, Dr Penguang udah ngatur randau ti sama begulai enggau rumah panjai bukai dalam N76, ti napi penanggul ke sama lalu minta sida anag ringat sereta mutarka sida ngena pengelandik runding ari ke ngena chara ke kasar.