Mayuh projek pemansang deka digaga di Selangau Perintah nengeri udah ngemendarka projek dikena ngenyampatka pemansang Selangau, ku Gira
SIBU: Selangau sedia deka gagit agi laban mayuh agi pemansang deka datai pulaika pemaik peranak iya, pia ku Kaban Kunsil Nengeri (ADUN) Tamin Christopher Gira.
Ba pekara tu, iya meri terima kasih ngagai perintah nengeri udah ngemendarka projek dikena ngenyampatka pemansang Selangau.
“Projek tu iya nya komplek lumba mit beungkus RM8 juta, Tebing Ai Selangau (RM5 juta), begunan baru Opis Pelilih ( RM5 juta), balai mayuhguna ungkup SJKC Tong Ah Selangau (RM500,000) sereta ngangkat manahka Jalai Pasai Siong (RM16 juta).
“Kereja ba projek tu dipesadang deka dipejalai pun taun baru laban sida diatu udah datai ba tikas langkar tumu,” ku iya lebuh bejaku bejadi muka Selangau Festival 2018 kena Hari Lima nyin tadi.
Gira mega berasai lantang beratika kerembai pengawa ngaga Opis Bomba Selangau diatu benung digaga, beungkus RM5 juta.
Berebak enggau pengawa nya, iya mega bisi ngemendarka pengawa ngaga Rumah Asap baru ungkup Pasar Se- langau enggau Sekuau dikena nyilih iya ke bisi diatu, ba kededua endur nya.
Gira mega ngemendarka pengawa ngaga tiga padang futsal ba Pasar Selangau, Tamin Batu 36 enggau Sekuau dikena nyendiaka perengka- guna lumba ti menyana agi.
Kesemua projek tu dipejalai di baruh belanja projek Program Transformasyen Menua Pesisir (RTP) 2019, ku iya.
Ngelansa pasal pengerami nya, iya meri tabi puji ngagai pengatur kelebih agi Kaunsil Pelilih Menua Pesisir Sibu (SRDC) udah mujur ngatur pengerami ti udah matak penatai mayuh pengusung.
“Pesta Selangau udah nyadi pelasar ungkup bala komuniti ba menua nya matak kaul enggau ejensi perintah sereta peluang ngelakuka industri dagang temuai ari pengawa ngatur mayuh aktiviti.
“Aku deka meda pengerami tu nyadi sebagi ari pengerami ninting taun di baruh SRDC,” ku Gira.
Seraya, Chairman SRDC Sempurai Petrus Ngelai madahka pengerami udah datai ba taun ketiga iya.
“Udah nyata Pesta Selangau nyapai juluk asal iya deka ngelakuka pasar Selangau ngagai peranak Sarawak. Besepiak enggau Batang Mukah, Pasar Selangau ba endur ti chukup strategik, antara Sibu, Mukah enggau Bintulu.
“Diatu Pasar Selangau tebilang enggau asil kampung. Tu ngasuh Selangau nyadi endur engkeman ngagai sida ti deriba nengah Pan Borneo ngetu lalu ngintu diri enggau bebelika asil kampung,” ku iya.
Tambah mega ku iya, pengerami nyadi peransang ngagai pengawa dagang ngerembai ke alai dia bisi lebih 30 bangsal bejualka bemacham pemakai dipanggang, kraf jari enggau ke bukai.
Sempurai gaga amat ati laban pekara tu meri peluang ngagai pengempu bansal ngulihka belanja.
Peluang tu mega meri peransang ngagai bala pedagang mansang ngagai tikas bukai baka muka kedai kupi enggau rumah endur bepanggang.
SamadataiChairmanPengatur, Kunsilor Ho Kok Munting. KUCHING: Gerempung Main Asal Dayak Sarawak (PKDS) merambu ngaga siti palan main asal ke mandangka identiti enggau main asal bemacham etnik Dayak di nengeri tu.
Chairman PKDS Judah Anom nengah surat penerang berita kemari madah gerempung berunding meli tanah ba sepemanjai jalai Kuching nuju Serian ngambika bisi endur numbuhka palan nya.
“Numbuhka palan main asal Dayak nyadi siti pengawa ke dikemerat PKDS ke udah direjista nengah Opis Pengerejista Gerempung(ROS),’ku Judah.
Ku iya nambah, belanja nirika palan nya urung RM6.5 juta lalu nya nyengkaum rega tanah.
Pengeran nirika palan nya ku Judah asil ari penyuah nemuai ngagai Pontianak enggau Kalimantan Barat.
“Di Pontianak, main asal Dayak mandangka gaya idup enggau identiti bemacham etnik Dayak di Kalimantan.
“Sida begempuru ba palan tu endur ngintu Hari Gawai, rami bukai sereta pengawa lumba enggau main,” ku iya.
Judah mega ngarap palan ke diperambu digaga nya tau nyadi palan pematak temuai jemah ila.
Palan nya ila ku Judah deka bisi bilik endur mandangka asil pengelandik jari bansa Dayak, muzium mini, bilik aum sereta opis.
Cherita sereta gambar raban orang ke tebilang di Sarawak baka ke atlit terjun menua Pandalela Rinong, bujang berani Kanang anak Langkau, penanyi Micheal Jemat, Andrewson Ngalai, Ricky L deka dipandang di palan nya.
Kepala Menteri keterubah Tan Sri Stephen Kalong Ningkan enggau Datuk Tawie Seli deka mega dipandang, Ku Judah.
Judah nambah, gerempung meransang bansa Dayak ke beumur ngelui 18 taun ngerejista nyadi kaban gerempung lalu bayar RM50 diletak ungkup nyadi kaban seumur idup.