Nembiak ari palan teknikal,vokasional diperansang ngaul diri ba aktiviti volunteer
MIRI: Bala nembiak ari palan teknikal enggau vokasional diperansang ngaul diri ba aktiviti volunteer enggau bala komuniti menua sida nyadika chara besaup meri bantu ngagai raban ti begunaka bantu.
Direktor Kolej Komuniti Miri Fadil Aziz madahka semengat volunteer meseti diterenak ngagai raban nembiak kemaya hari dikena nempa sida nyadi raban komuniti ti bisi penyiru.
“Kaul ba aktiviti volunteer enggau servis komuniti antara bala nembika ngemai sida begulai enggau bala komuniti diri, angkunka sida sereta ngambi ati enggau runding sida.
“Tu mega ngasuh sida ulih meri penemu baru tauka nambahka pengelandik ke bisi (upskilling and reskilling) mantu bala komuniti ngemanahka ukai semina pengelandik tang mega penatai pemisi ruang bilik sereta ngangkatka tikas pengelantang enggau kualiti idup sida,” ku iya lebuh bejaku ba pengawa bejadi enggau nutup program keterubah ‘Kembara Siswa Patriotik 2018 Siswa Bersama Komuniti Zon Miri’ ba Dewan Kampung Lembah Hijau ditu, apin lama ke udah.
Ku Fadil, program diatur Bagi Pekara Pemansang Nembiak, Opis Menteri Pelajar, Opis Pelajar Tinggi sereta bekerejasama enggau Universiti Malaysia Sarawak (Unimas), udah diatur beserimbai enggau pengerami Hari Nasional Ke-61 enggau Hari Malaysia taun tu.
Iya meri terima kasih ngagai Kolej Komuniti Miri ti dipilih nyadi pengatur ungkup Zon Miri bekerejasama enggau Palan Pematih Pengajar (IPG) Sarawak Miri sereta mega lima institute pelajar bukai ti ngaul diri sereta program mega bisi diatur ba Kuching, Bintulu, Sibu enggau Betong.
Lebih ari 100 volunteer datai ari bala nembiak ari IPG Sarawak Miri, Institut Latih Pengelandik Nembiak Menua (IKBN) Miri enggau Kolej Komuniti Miri ti ngaul diri ba mayuh bengkah aktiviti komuniti ba program sehari nya.
Sama bisi ngambi bagi ba program nya iya nya bala nembiak sekula primari enggau nembiak mit ari SK Lopeng Tengah, SK Kampung Luak, SK Agama, SK Pujut Corner, SK Riam Batu 2, Taska Sedidik Kampung Lembah Hijau sereta mega Program Komuniti Bepengerai Renggat Nasional (Kospen).
“Batang tuju program tu mai bala nembiak ari pupu bansa semak enggau program komuniti, dikena nambah enggau negapka penaluk ke menua, kelala enggau penyerakup bansa antara sida ngambika nempa sida meruan agi nyadi ketuai menua dudi hari, nerenak enggau ngelakuka pengawa volunteer ngagai bala nembiak enggau komuniti,” ku iya.
Antara aktiviti bisi dipejalai beserimbai enggau program iya nya pengawa beripai (nembuka pengawa ba taman herba, ngupas kandang ngelingi enggau program negapka akademik (worksyop UPSR enggau pekit ngelinsu), kus pandak ba nambahka pengelandik enggau beperesa pengerai ari Kospen.
“Langgur penemu taman herba datai ari Ketuai Kampung Lembah Hijau empu enggau ngarapka bala nembiak enggau rebak nembiak deka ngelala herba ti suah dikena ba Malaysia, nyengkaum pemakai menua tu,” ku iya nambah.
Ketuai Genturung Pendiau Lembah Hijau Adam Malek Han mega bisi datai ngulu program nya, ke alai pengawa bejadi nutup udah dipenyadi Residen Miri Sherrina Hussaini.