DCCI minta perintah besai meri komuniti Dayak kuota, pengelebih ba sekeda pekara

KUCHING: Balai Dagang enggai Industri Dayak (DCCI) udah minta perintah besai ngagihka kuota khas ba pekara servis, permit, enggau pengelebih bukai ngagai komuniti Dayak seriris enggau Konstitusyen Perintah Besai.

Nyemetak madahka program khas ti ditagit ba peminta komuniti Dayak patut dipejalai enggau dirumban, laban pekara tu deka nguasa pengawa dikaul bansa Dayak sereta ngambika mayuh agi sida ngaul diri ba dagang enggau ekonomi nasional.

Pekara tu dipansutka Sapit Presiden DCCI Kilat Beriak maya ‘Congress on the Future of the Bumiputera and Nation 2018’ di Kuala Lumpur apin lama ke udah sereta mantar Kongres dulu ari nya ba Putrajaya.

Iya udah madah ba mua mayuh ke alai lebih empat puluh taun udah semina ngangkat sekeda segmen ari komuniti Bumiputra.

“Komuniti Dayak ba Sarawak enggau komuniti Kadazan Dusun ba Sabah kesemua udah dikelaung sereta tinggal ba belakang. Bansa Dayak enda ‘dipeda’ ba ‘skrin radar’. Bemacham langgur ekonomi enggau polisi enda masuk ngagai komuniti Dayak. Kaul bansa Dayak ba pengawa dagang, dagang enggau industri agi mimit amat, semina sekeda bansa Dayak aja nyata udah maju tang tebal agi bansa Dayak agi jauh tinggal ba belakang ari komuniti bukai di Malaysia.

“Bisi pekara suah diasaika bala komuniti Dayak, betul tauka salah, ke alai kitai dikelaung. Nyata amat atur pengawa ke suba diterima perintah ungkup semua Bumiputra iya nya enda segemitan naka ni komuniti Dayak ba Sarawak diperati,” ku iya lebuh bejaku ngarika DCCI maya Kongres nya.

Ku iya nambah, sekeda komuniti dagang Dayak bisi penau bekaul enggau peneleba ba mayuh bengkah sektor dagang enggau industri. Taja pia, laban baru ba pengawa dagang, sida napi penimpang ari ditekul ba pekara belanja.

Senentang isu tekul belanja, iya minta perintah nyendiaka mayuh agi belanja dikena bejalaika pansik enggau ngeluarka surat pala tanah Hak Adat Bansa Asal ( NCR) ngagai bansa asal ngambika ulih ngena reta nambahka puku sida.

“Tebal agi projek perintah netapka sengkan kelalu tinggi ba pematut bala kunteriktor, nempa pengawa bechiping ti bepiak ngagai raban konglomerat kaya. Jaku pandak, projek perintah dimonopoli raban elit,” ku iya.

Senentang projek besai tu, iya merambu ngambika pengawa magi projek baka tu patut nyadi pakej mit agi sereta ngalau sekeda ari pakej mit agi tu ungkup ditinda antara kunteriktor Dayak.

Ngelansa pekara bekaul, iya mega ngarapka perintah besai deka meri pemerat ngagai kompeni Dayak bejalaika projek pemansang menua pesisir.

Iya nyenggala nyebut perintah besai mega udah puntan ba pekara beratika penemu adat menua tu, adat, budaya, gaya enggau pekara dalam langkar enggau bejalaika polisi bekaul enggau Sarawak.

Siti kes ti balat diperati iya nya peminta ukai semina Setipikit Halal aja tang mega sarikat diempu raban Islam ngambika nangkup atur ngaga tinda bekal pemakai enggau bekal catering pemakai ba sekula menua pesisir Sarawak taja sekula nya nadai nembiak megai pengarap Islam.

“Peminta tu otomatik sereta enda adil ngelaungka bala kaban DCCI enggau komuniti dagang menua tu ari ngaul diri ba tinda nya.”

Ku iya DCCI mega minta perintah besai nempa pekara tu nyadi polisi nasional pemadu tinggi lalu ngagihka mayuh agi belanja dikena ngemanahka infrastruktur enggau penyikap perengka guna pelajar ba kandang menua pesisir Sarawak.

Kebuah pia, komuniti Dayak ngarapka dudi hari sida deka ulih bediri ngatika diri lalu badu agi bepanggai ba pengawa ngandalka perintah.

Ba pekara bekaul, iya minta perintah ngagihka mayuh agi penuduk tauka netapka kuota penuduk ngambi nembiak Dayak besekula ba tikas pelajar tinggi sereta nyendiaka agih belanja besai agi ari belanja skolarsip tauka bansa bantu belanja bukai ungkup nembiak Dayak.

“Kitai mega ngarapka Perintah Besai deka ngagihka geran ngagai DCCI dikena nempa kapasiti enggau program pemansang pengawa dadagang dikena meri peransang penyereta bansa Dayak ba pengawa dagang, bejual bebeli enggau industri,” ku iya.

Iya mega madahka DCCI nyukung pengawa numbuhka ‘ National Action Council’ ngambika nyerenih baru enggau matau pengawa pejalai polisi nentuka iya datai ngagai raban ditagit lalu nyapai juluk sida.

Kongres udah dipenyadi Menteri Besai Tun Mahathir Mohamad kena 1 September, ti meda penyereta ari urung 2,500 iku datai ari serata menua Malaysia.

Menteri Pekara Wang Datuk Seri Mohamed Azmin Ali nguluka bala pengatur Kongres, ke alai pengawa bejadi nutup udah dipenyadika Datuk Seri Anwar Ibrahim. MIRI: Kebun komuniti baru deka digaga ba Pa’ Mada ba Tanah Tinggi Kelabit.

Rumah panjai 23 pintu bansa Kelabit nerima geran Projek Mit Pemansang Menua Pesisir penyampau RM10, 000 ungkup projek komuniti baru ari Kaban Kunsil Nengeri ( ADUN) Mulu Datuk Gerawat Gala ba sebengkah pengerami makai lemai diatur ba Hotel Mega ditu, apin lama ke udah.

“Kebun komuniti tu deka nyadi palan peranak ulih betanamka kayu buah, herba tauka sayur, semua orang ulih ngasaika buah, tauka sebarang asil ulih diketau kitai, sebarang maya sida mulaika diri ke menua.

“Kami meda tu projek komuniti ungkup komuniti, ari komuniti. Tu mega deka manah agi ditambah ke dalam lis pematak bala temuai ti datai nemuai ngagai Pa Mada sereta kandang menua ngelingi iya,” ku iya.

Gerawat ngumbai pengawa ngaga beberapa projek ba genturung pendiau nyengkaum ‘gazebo’ enggau kebun komuniti nyadi pengawa chukup manah.

“Aku andal sebuah genturung pendiau mit ti ngembuan mayuh kualiti enggau peranak chukup regas sereta nyulut, projek tu deka nyadi siti pemujur besai.”

Ku Gerawat, batang tuju pengerami makai lemai ngiga belanja berambaika jaku ‘Know Pa Mada, Love Pa Mada’, ngelakuka Pa Mada ngagai rebak nembiak enggau bala bakih bukai, ulih nyadi chunto ngagai genturung pendiau bukai ba sitak iya ngambika nunda.

“Beguna amat ngagai kitai nyadi apai indai nentuka bala anak diberi awak pulai ke menua suah agi ngambika sida bisi kaul.

“Raban rebak nembiak kitai patut nelebaka diri ngagai menua asal sida ngambika sida bisi pengangkun lalu enda mudah enda ingatka penatai asal sida,” ku iya nerang.

Gerawat madahka Pa Mada tu sebuah genturung pendiau chukup nyelai laban udah nempa mayuh kelebih agi orang ti bekuasa enggau bala pastor.

“Tu berekat ari Tuhan ngagai Pa Mada enggau peranak iya, sereta mega komuniti Kelabit kitai,” ku iya, seraya nambah, peranak Pa Mada mega bagas gawa ba umai sida.

Gerawat mega ngelalau raban nembiak seruran bebasaka sida ke tuai.

“Enti ukai ketegal sida, kitai enda ulih ngasaika pekara ti diasaika kitai kemaya hari.

“Kitai meseti ngenang jasa sida ngagai idup kitai, mantu ngetanka kualiti ba genturung pendiau kitai, sereta seruran nampung pengawa sida ngemai komuniti kitai ngerembai sereta mansang menyana agi,” ku iya.