Dikena nyapai juluk nya perintah bisi nyendiaka perengkaguna ke chukup nyengkaum ngatur program khas
SPAOH: Perintah nengeri meri fokus ngagai penyulut pelajar enggau nyendiaka perengkaguna ti diguna ba tuju nya.
Sapit Kepala Menteri Datuk Amar Douglas Uggah Embas madahka antara perengkaguna disedia iya nya ngatur program khas enggau mai raban bepenau ari luar ngembing sereta ngajar bala nembiak sekula kelebih agi ti deka napi peresa perintah.
“Kitai dekaka bala nembiak kitai nerima pelajar ke pemadu manah nentuka sida bulih pemutus nyulut ba akademik.
“Nya kebuah kitai ngatur program khas enggau reti mai bala bepenau ari luar ti ulih mantu laban juluk kitai iya nya nentuka bala nembiak sekula disikap fasiliti ti meruan ngambika sida teulihka pemutus nyulut ba pelajar,” ku iya.
Kitai dekaka bala nembiak kitai nerima pelajar ke pemadu manah nentuka sida bulih pemutus nyulut ba akademik. Datuk Amar Douglas Uggah Embas Sapit Kepala Menteri
Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka jaku nya lebuh bejaku nutup Kem Kecemerlangan Ujian Penilaian Sekolah Rendah (UPSR) Sitak Bukit Saban ditu, Hari Minggu tu tadi.
Iya ti lalu nyadi Kaban Kunsil Nengeri (ADUN) Bukit Saban nambah, pengawa ngatur program kerejasama baka nya deka seruran diatur dudi hari pulaika penyulut pelajar ba nengeri tu.
‘ Kem Kecemerlangan UPSR’ tu diatur ba Palan Servis DUN Bukit Saban pengelama dua hari berunggu ngagai tujuh buah sekula primari (SK) iya nya SK Spaoh, SK Suri, SK Ng Gayau, SK Penom Paku, SK Paku Central, Sek St. John Ng Tiga Ulu Layar enggau SK St Christopher Debak.
Kem tu diatur ba Balai Komuniti Spaoh lalu digulu 173 iku nembiak enggau tuju mai bala pesereta beratika bemacham tanya ba keretas tanya UPSR, meri chara nyaut tanya nitihka tikas pemar ngena chara ti betul.
Kelimpah ari nya, naka ulih nguji mutarka penanggul ditapi bala nembiak maya nyaut tanya UPSR, ngiri bala nembiak enggau bemacham penemu, chara nyaut tanya sereta meri peransang nga- gai diri ngambika sedia napi UPSR ti ditimpuh kena 24 nyentuk 27 September tu.
Nitih ku penerang, empat subjek diselinting iya nya Jaku Melayu, Jaku English, Matematik sereta Sains lalu bala fasilitator ti datai ari sida ti bisi peneleba ba subjek nya kelimpah bisi sekeda sida tu orang ti meresa keretas tanya UPSR renggat nasional.