Pengagit gawa beripai patut dikemeranka ba kaban PIBG, JKKK
KAPIT: Pengagit gawa beripai meseti diterenak enggau dikemeran ba kaban Serakup Apai Indai enggau Pengajar (PIBG) enggau genturung pendiau tauka Komiti Pemansang Enggau Pengelikun Genturung Pendiau (JKKK) maya bejalaika pengawa projek mit ngemanah ba sekula tauka rumah panjai, pia ku Kaban Kunsil Nengeri ( ADUN) Pelagus, Wilson Nyabong Ijang.
“Pengagit gawa volunteer enggau ngaul diri nerenak asai ngempu enggau siruka komuniti kitai. Aku chukup lantang ati meda pemanah timbal (penyampau tubuh) ke datai ngagai projek beripai masang kelebat, nyemin, nyeruri enggau ngangkatmanahka jalai semin ke bisi nyambung Sekula Primari (SK) Nanga Antaroh ari simpang Jalai Antaroh, Sut ditu.
“Penatai bala kita ngayanka pengeran kita gawaka sekula ti besemak enggau rumah panjai kita ti nyendiaka pelajar ngagai bala anak. Besaup kitai ngintu palan pelajar tu nengah pengawa mantu enggau kerejasama rat ngagai raban sekula dikena nentuka bala anak ulih belajar ba rampa ti kondusif,” ku Nyabong.
Iya mansutka jaku nya ba program projek beripai ujung minggu nyin tadi ti diatur ba SK Nanga Antaroh, Sut, ngemanah enggau ngalitka lubang ba jalai semin ari simpang Jalai Antaroh ngelawa sekula nya.
Perengka ke dikena ngaga nyengkaum dua trak ngulai semin, tiga iti kelebat, BRC, batu, pasir, papan kayu, enggau ke bukai ti dipelanja nengah Projek Mit Pemansang Menua Pesisir (MRP) Nyabong.
Sekretari Politik Kepala Menteri Sarawak, Nicholas Kudi Jantai, Pemantu Pengatur Pengawa Nyabong, Wallace Paul Hitler, Kepala Pengajar sekula, Baling Unan sereta kaban PIBG antara bala bisi datai ngulu pengawa beripai nya.