Sida meseti nemu pengawa raban ke tuai ti bebendar ngetanka menua tu ke lalu bulih pengelantang ti diasai diatu
SRI AMAN: Raban nembiak rebak baru diperansang bela ngaul raban besai tuai meretika reti merdeka menua ke amat ngambika runding talukka menua enda lenyau.
Kaban Kunsil Nengeri (ADUN) Lingga, Simoi Peri madah endang patut raban nembiak kitai kemaya hari nemu pasal pengawa bala ketuai menua dulu suba ti mayuh gawa negika menua.
“Pekara tu beguna amat laban mayuh rebak biak kemaya hari enda entu nemu sejarah bala ketuai menua ti udah mayuh bejada ba pengawa negika menua ari pegai kuasa luar,” ku iya.
Iya mansutka jaku nya lebuh bejaku ba Program Semarak Merdeka diatur Gerempung Raban Indu Sarawak (PPWS) Pelilih Sri Aman bepalan ba Begunan PPWS, semak ditu.
Nitih ku iya, pengawa nerenak semengat talukka menua ngagai rebak biak patut kelebih agi dikena meri peransang semengat angkunka menua ti begunaka ulah ti pun, liat ati sereta angkun.
“Meretika reti merdeka ngagai raban biak patut seruran dipejalai nentuka semengat talukka menua enda lenyau sereta rapas ari tinjau rayat.
“Ulah talukka menua patut diterenak kenyau ari sekula. Kebuah pia, rebak biak tu mih deka nyilih bala ketuai menua dudi hari,” ku iya nerang.
Ku iya, ulah talukka menua ukai semina ngitang Jalur Gemilang tauka konvoi ngena motosikal meredeka aja baka ti suah dipeda kitai ba sebarang pengawa ngintu Hari Meredeka, tang semengat talukka menua tu patut bisi ba tubuh kitai empu.
“Kitai pechaya, nengah ak-
Pekara tu beguna amat laban mayuh rebak biak kemaya hari enda entu nemu sejarah bala ketuai menua ti udah mayuh bejada ba pengawa negika menua ari pegai kuasa luar. Simoi Peri ADUN Lingga
tiviti ngitang Jalur Gemilang ukai semina ngerichahka agi bulan merdeka tang udah nyata ngayan ngagai semua rayat Malaysia ngembuan runding talukka menua meseti bisi ba tubuh kitai ti nyadi rayat Malaysia.
“Kitai ukai semina rindu ati aja ngitang tambai Jalur Gemilang, tang kitai meseti bisi ulah taluk enggau angkunka menua,” ku iya madah silih.
Sama bisi datai Chairman PPWS Pelilih Sri Aman, Seniah Julhi, Kaunsilor Tan Ing Siang sereta bala kaban PPWS ti buaki.
Berebak enggau program nya, Simoi mega bisi ngemendarka agih belanja ungkup taun 2019 penyampau RM3,000 ngagai PPWS Pelilih Sri Aman ungkup belanja gerempung nya.
Program nya mega richah enggau pekit lagu patriotik, pekit ngelagu bungai sereta bejualka produk menua nya.