Peranak Rumah Stanley Ejau ngadang diri napi penusah tanah tusur
BETONG: Sebuah rumah panjai, 21 pintu bilik ngadang diri napi penusah tanah tusur ti ditemu bisi nyadi tumu pagi kemari.
Rumah Stanley Ejau, Jungkal, Betong ti dientak atas bukit napi tanah tusur nyangka ketegal ujan enggau kabut ti mangka Betong, nadai ngetu pengelama dua jam kena Hari Satu tadi.
Penerang ti diterima ari Opis Bomba enggau Penyah Penusah (BBP) Betong, raban sida nerima ripot pagi kemari ti minta pengawa matau dipejalai bekaul enggau bekau tanah tusur ti dipeda ba mua bukit ba tisi rumah nya.
Berindik ari ripot diterima, raban Bomba udah bejalaika pengawa matau ti tetemuka bekau tusur ti nyadi ketegal ujan lalu tanah tusur ti mangka mua bukit ba tisi rumah nya.
Bomba mega ngelalau peranak seruran ngadang diri sereta beratika gaya ngelingi sida.
“Enti sema bisi tanah asai berenyang lalu gaya tusur tanah balat, padah jampat ngagai BBP Betong,” ku iya.
“Kelimpah ari nya, pengawa tumu ti patut dipejalai iya nya peranak rumah panjai nyendiaka kanvas tauka kain getah dikena ngebap kandang tanah ti tusur.
Berebak enggau nya, urung 70 iku peranak rumah panjai berasai rawan enggau penusah ke nyadi. Sida irauka tanah tusur deka terus nyadi lalu tau ngasuh penusah besai nuntung. MIRI: Stanley Aba@Yaba dipilih nyadi Chairman Serakup Pengajar Bisaya Sarawak rambau Aum Besai Ninting Taun (AGM) keterubah ti diatur ba Bilik Aum Sekula Primari (SK) Edmund, Limbang kemari.
Aum nya bela ngemataka pengawa milih William Awang (penulung chairman), Henry Madai ( sekretari), Roslind Lukong (penulung sekretari) enggau Sebastian Kaban Apong (tukang wang).
Bela dipadu mangku pengawa nyadi kaban komiti ( AJK) iya nya Enderick Enjan, Narawi, Poul Nanggang, John Sungkai, Sedi Pura, Hearitta Rity, Helimah Muda, Freda Linus Lukong, Annie Phang, Nerama Bunjok enggau Teo Kim Hoi.
Pengari serakup, Poul Nanggang madahka serakup tu nyadi gempung rejista enggau Opis Pengerejister Gerempung (ROS) ti dikemendar ba tengan taun 2018.
“Nyadi gempung ti baru, serakup tu nguji bekerejasama enggau semua raban ti bekaul enggau dunya pelajar baka perintah besai, Opis Menteri Pelajar Malaysia, perintah nengeri, Opis Pelajar Nengeri enggau Opis Pelajar Pelilih.”
“Tu dikena mantu bala anak etnik Bisaya bulih awak enggau bantu pelajar ti meruan agi kelimpah ngintu pengelantang pengajar Bisaya ba Sarawak,” ku iya.
Kelimpah ari nya, nyendiaka bantu baka bup tulis, bup akademik, magazine, kereban sekula ngagai nembiak Bisaya ti seranta sereta begunaka sukung.
Iya ngarapka semua pengajar ari etnik Bisaya ba serata Malaysia ulih meri sukung enggau saup ba pengawa nya.”
“Pekara ti beguna amat solidariti ba raban pengajar Bisaya dikena mantu anak Bisaya maju baka raban etnik ti udah maju,” ku iya.
Urung 100 iku datai nyengkaum sida ti merati enggau pengajar Bisaya ari ngelingi Limbang, Miri enggau Lawas.
Antara agenda aum kelimpah milih komiti iya nya program motivasyen apai indai, nembiak enggau komunitik ba pengawa nyungkak pelajar ti diatur sereta program ngiga belanja dikena gempung nya bejalaika pengawa.
Program tu deka nambahka penyedar pelajar ngagai komuniti Bisaya begulai sinergi enggau Opis Pelajar Nengeri Sarawak, Opis Pelajar Pelilih, Serakup Bisaya enggau Serakup Apai Indai enggau Pengajar ( PIBG) tetiap sekula ti bisi nembiak Bisaya ba Limbang.