Urung 27 sitak di Miri udah digazet ngambi ulih disukat

MIRI: Urung 27 sitak ke mungkur 18787 hektar udah digazet ngambika ulih disukat kelingi ungkup bagi menua Miri.

Ari penyampau, tiga sitak ke mungkur pemesai 3,764 hektar udah nerima Warta Seksyen 6 ari Opis Tanah enggau Survei (JTS).

Sitak ke digazet tu iya ba Swk. L.N. 73 mungkur kampung Long Seniei Akah Baram (3703 hektar) , Swk. L. N. 207 mungkur kampung Sungai Engkeririn Suai (15.475 hektar) enggau Swk. L. N. 76 nyengkaum kampung Bukit Peninjau Sibuti (46.4 hektar).

Sapit Kepala Menteri Datuk Amar Awang Tengah Ali Hasan datai nyuaka Warta Seksyen 6 KTN di JTS semalam.

Penguasa JTS Miri Arni Abdul Rahman ngelalau bala ketuai genturung pendiau enggau peranak ba Warta Seksyen 6 berundingka inisiatif kediri ngelai adan enggau pangan diri.

Ku iya, tu endang atur keterubah ungkup pengawa nyukat kediri lalu ngelai adan diri empu.

Berumba enggau nya, Awang Tengah bisi nyuaka 107 Surat Pala Tanah Kediri nyengkaum ari 34 lambar surat pala tanah nengah Seksyen 18 asil ari perati ku inisiatif baru NCR ungkup empat genturung pendiau,

Sitak nya iya nya Tr Albion Tiris (tujuh surat paka tanah), kpg Sebalik/Pintasan Tiris (lapan), Kayu Kapor (13) enggau kpg Terahad Sibuti (enam).

Bela disua iya nya 73 Surat Pala Tanah Kediri enggau ba baru progam nyukat kampung tradisoal nyengkaum kpg Batu Lapan (39), kpg Kuala Sibuti (dua) enggau Kayu Kapor (32).

Chek pampas tanah mega disuaka ngagai projek langgur ngaga kelapa sawit di Bakong.

Arni madah, kerejasama ke manah mega dikeingat, kerejasama manah dikearap dikena nentuka pemujur pangka pemansang enggau ekonomi.