Polisi nya mesti dititih ngambika program pemansang ke ditusun enda ngeruga pemaik rampa menua, ku Abang Johari
KUCHING: Kira 70 peratus kandang tanah Sarawak mesti agi meruan ditejuka nyadi kandang kampung, ku Kepala Menteri Datuk Patinggi Abang Johari Tun Openg.
Laluh ari 70 peratus nya ku iya diungkup ngagai pengawa betanam betupi enggau program pemansang mengeri.
Iya netapka polisi nya mesti dititih ngambika program pemansang ke ditusun enda ngeruga pemaik rampa menua.
“Rampa menua rusak ketegal pengilap kita mensia. Kitai enda ngintu chara idup enggau pemeresi.
“Ketegal nya perintah netapka polisi ngambika kitai ngintu kandang endur kitai di serata Sarawak.
“Kampung kitai tambah ngambika sebaka enggau pinta pemansang. Kitai netapka 70 peratus kandang tanah Sarawak ngarika kampung,” ku iya.
Abang Johari mansutka jaku nya rambau bejadi program ‘ World Cleanup Day’ di Kampung Masjid ditu, kemari.
Ngenang kaul bukai, Abang Johari minta peranak Menegri Kuching sama bela ngesan tanggungpengawa ngintu pemeresi kandang endur ngelingi.
Ku iya, Mengeri Kuching udah diangkat nyadi sebngkah mengeri ke diuan komuniti ti beresi sereta bepengerai.
Ku iya basa nya chukup besai lalu tanggungpengawa diatu disan semua peranak Mengeri Kuching ngambi ulih ngenan gelar ke udah diberi.
‘ Baka ni ngenan?... semua nya bepanggai ba kitai. Peranak mengeri mesti bisi semengat ke ulih dikearap sereta sedia ngesan tanggungpengawa,” ku iya.
Program ‘World Cleanup Day’ kemari diatur ba maya ke sama di lebih 150 bengkah menua.
Abang Johari madah program diatur enggau tuju nerenak reti tangungpengawa ba atur ngintu pmeresi kandang endur.
Ku iya, pemeresi meri empas ke positif dalam pengidup lalu pemaik rampa menua nyadi siti pekara ke pemadu berat.
Bela datai Sekretari Perintah Nengeri Tan Sri Moha- mad Morshidi Abdul Ghani, Kaban Parlimen (MP) Petra Jaya Dato Seri Fadillah Yusuf, Datuk Bandar Dewan Bandaraya Kuching Utara Datuk Abang Abdul Wahap Abang Julai enggau Datuk Bandar Majlis Bandaraya Kuching Selatan Dato James Chan.
Rampa menua rusak ketegal pengilap kita mensia. Kitai enda ngintu chara idup enggau pemeresi. Datuk Patinggi Abang Johari Tun Openg Kepala Menteri Sarawak