Mayuh kes ti dirikod iya nya bekaul kereban timbang enggau sukat ti abis timpuh lalu RM8,250 kompaun udah dipansut
SIBU: Opis Menteri Dagang Dalam Menua enggau Pekara Bebelika Barang (KPDNHEP) udah nangkap 52 kes penyalah timbang enggau sukat semanjai taun tu.
Bala pedagang mesti nganjung kereban nimbang enggau nyukat sida ngagai Metrology Corporation Malaysia (MCM) ngambika dikemaru dalam timpuh staun sekali. Roslee Maslie Ketuai KPDNHEP Sibu
Ketuai KPDNHEP Sibu Roslee Maslie madah, mayuh ari kes ti dirikod tu iya nya ngaul kereban nimbang enggau nyukat ti udah abis timpuh.
Beserimbai enggau nya, ku iya, bisi mega barang ti udah ditangkap sepenyampau RM9,295 lalu kompaun sepenyampau RM8,250 udah dipansut.
“Penyalah ngena kereban nimbang enggau nyukat ti udah abis timpuh siti penyalah ari baruh Akta Timbang dan Sukat 1972.
“Bala pedagang mesti nganjung kereban nimbang enggau nyukat sida ngagai Metrology Corporation Malaysia (MCM) ngambika dikemaru dalam timpuh staun sekali,” ku iya.
Nyema ditemu salah, bala pedagang ulih ditinggang ukum enda lebih ari RM4,000 tauka jil enda lebih ari tiga taun, tauka kededua nya sekali.
Berindik enggau nya ku Roslee, KPDNHEP bisi nyediaka kereban timbang di kaunter endur betanya ba Pasar Sentral Sibu ungkup dikena mensia mayuh.
“Nyema penguna bisi kakang ati, sida ulih ngena kereban nimbang nya ke udah disediaka,” ku iya.
Iya mega nmadah, siti ari kereban nimbang nya iya nya ungkup barang ti ‘ halal’.