Abang Johari: Institusyen injinir deka diangkat nyadi palan pesaka
KUCHING: Institusyen injinir ke pemadu lama di Sarawak, Brooke Dockyard deka diangkat nyadi palan pesaka di Mengeri Kuching.
Kelimpah ari nya, Kepala Menteri Datuk Patinggi Abang Johari mega madah Brooke Dockyard deka nyadi palan endur nyual produk ari asil pengelandik jari.
“Begunan Brooke Dockyard ke diatu deka digaga manah tang kita enda ngubah pendiau asal begunan tu.
“Kitai ngasai palan tu deka nyadi siti agi palan pesaka di Mengeri Kuching,” ku iya.
Abang Johari mansutka jaku nya ngagai pemberita pengudah bejadi ‘ World Cleanup Day’ di Kampung Masjid iya nya besemak enggau Brooke Dockyard ditu, kemari.
Iya nambah, siti kapal layar ke nyemaka Kapal Rajah Brooke-The Royalist deka mega dipandang ba Brooke Dockyard jemah ila.
Ku iya, Royalist diatu benung digaga nitihka pemesai ke endar di United Kingdom (UK).
“Diatu bisi pengawa ngaga cherita Rajah Brooke ke diadu Brooke Foundation enggau Hollywood lalu sida ngaga kapal ke sebaka enggau Royalist di UK.
“Pengudah tembu cherita nya jemah, kapal layar tu deka dibai ke Sarawak lalu dipandang di Brooke Dockyard sereta digaga nyadi restoran,” ku iya.
Ngenang kaul ke sama, Abang Johari madah pengawa ngangkatka Brooke Dockyard nyadi palan pesaka sebengkah ari program pemansang Waterfront Kuching.
Iya madah renggat keterubah program nya mungkur pengawa ngemanah tebing sungai ti begunaka belanja RM6 juta.
Renggat kedua ku iya mungkur pengawa ngemanah Brooke Dockyard lalu begunaka belanja RM10 juta.
“Reti nya, Brooke Dockyard deka disambung ngagai Waterfront Kuching lalu terus nuju ‘Masjid Terapung’,” ku Abang Johari seraya madah kededua renggat program begunaka timpuh 3 taun.